Read luo Zaburi 71 Bible Online

Zaburi 71 - luo bible

Zaburi 71

¹A Ruoth Nyasaye, in ema ageno kuomi. Kik iwe loya, mi wiya kuodi,

²to ka in Nyasaye makare, konya kendo resa. Chik iti iwinj gima awacho, mondo iwara.

³Bedna lwanda ma aresorae, kendo ohinga motegno mogeng’a. To adier, inie lwandana kendo ohingana.

⁴A Nyasaye, resa kuom joricho. Ee, gola e teko joma ger ma timbegi mono.

⁵Ruoth Nyasaye, aketo genona kuomi, mana kaka asebedo ka atimo chakre aa e nyathi.

⁶Asetenora kuomi nyaka ne nywola, bende isebedo kirita nyaka ne aa ei mama. Pile abiro bedo ka apaki.

⁷Ngimana osebedo ka odhiero ji mang’eny, to in e jaritna maratego.

⁸Odiechieng’ duto asiko ka apaki, kendo ahulo duong’ni maler.

⁹Kik koro idaga ni ati! Adier, kik tinde ijwang’a ni tekra orumo.

¹⁰Wasika chano kaka diginega.

¹¹Giwacho niya, “Nyasaye osejwang’e! Walaweuru mondo wamake, nikech onge ng’ama nyalo rese!”

¹²A Nyasaye, kik ibed mabor koda, to yie ikonya piyo, yaye Nyasacha.

¹³Joma nega onego lo kendo rum. Adier, mad kuod wi joma dwaro hinya, mi ng’eng’ nono.

¹⁴An to pile abiro keto genona kuomi, kendo anamed mana paki.

¹⁵Anahul timni makare, kendo pile anawuo kuom warruok maa kuomi, kata obedo ni otut modhiera winjo kamano.

¹⁶Ruoth Nyasaye, anapak timbeni madongo, kendo anahul timni makare. Ee, anahul timni kende

¹⁷A Nyasaye, isepuonja nyaka ne aa e nyathi, kendo ndalona duto asebedo ka ahulo timbeni miwuorogo.

¹⁸To kaka koro ati, kendo wiya oselokore lwar, yie kik ijwang’a, yaye Nyasaye! Bed koda ka ahulo tekoni gi duong’ni ni tienge duto mabiro.

¹⁹A Nyasaye, timni makare tundo nyaka e polo malo! Isetimo gik madongo, omiyo onge ng’ama romo kodi.

²⁰Isemiyo aneno chandruok gi rem malit, to ang’eyo ni ibiro meda teko, kendo ibiro gola e liel.

²¹Ibiro meda duong’ moloyo, kendo ibiro chako ikueyo chunya.

²²A Nyasaye, abiro paki ahinya gi thum, nikech in jaadiera. Abiro weroni wende gi thum, yaye Ng’ama Ler mar Israel.

²³Anakog gi mor, ka agoyoni thum Adier, abiro wer gi tekra duto, nikech isewara.

²⁴Pile anawuo kuom timni makare, nikech joma ne dwaro hinya oselo, mi wigi okuot.