Read luo Zaburi 74 Bible Online

Zaburi 74 - luo bible

Zaburi 74

¹A Nyasaye, isejwang’owa kamano nang’o? Bende mirima biro maki gi jogi iwuon nyaka chieng’ adier?

²Parie joma ne iyiero chon mondo obed jogi. Gin joma ne iwaro mondo obed ogandani iwuon. Bende parie got Sayun kama ne isedakie.

³Bi mondo iwuoth e dala mane osekethoreni. Wasikwa oseketho Hekalu mari chuth.

⁴Wasiki nopong’o Hekalu gi koko, kendo ne gichungo bandechegi ka ginyiso ni gisekawe.

⁵Ne gigoye piny mana ka joma tong’o yien gi ledhi,

⁶kendo ne gibaro gik mopa duto gi ledhi kod nyundo.

⁷Bende ne giwang’o Hekalu mari gi mach, mi gidwanyo kama ilamie. Adier, ne gikethe chuth!

⁸Ne gichano mondo gitiekwa pep, kendo ne giwang’o kamoro amora milami e piny.

⁹Ok wanyal neno gik maler mane watiyogo e lemo, bende koro waonge jonabi. Waonge gi ng’at mong’eyo ni gima osetimoreni biro siko nyaka karang’o.

¹⁰A Nyasaye, wasikwa biro jarowa kuom kinde marom nadi? Koso gibiro yanyo nyingi nyaka chieng’?

¹¹Ere gima omiyo itamori konyowa? Koso ang’o momiyo ing’wonyonwa lweti?

¹²To in Nyasaye, isebedo Ruodhwa nyaka nene, kendo isebedo kilocho e piny ngima.

¹³ Ne ipogo nam gi tekoni mang’ongo, mi itoyo wiye mag ondiegi nam.

¹⁴ Adier, ne itoyo wiye mag Levayathan, mi imiyo joma odak e thim ringre mondo ocham.

¹⁵Nimiyo sokni gi aore omol, kendo in ema nimiyo aore ma ok duon oduono.

¹⁶In ema ne ichueyo odiechieng’ gi otieno, mi iketo wang’chieng’ gi due karegi.

¹⁷Niketo tong’ mag piny. Oro gi chwiri bende in ema niketo.

¹⁸To par ineye A Nyasaye, kaka wasiki mofuwo jari.

¹⁹Kik ijwang’ jogi moheri e lwet wasikgi makwiny, kendo kik wiyi wil gi jotichni misando,

²⁰to par singruok mane itimo kodwa. Kuonde duto motimo mudho e piny opong’ gi timbe mahundu.

²¹Kik iwe lo joma ithiro, to joma odhier kendo ma jochan mondo opaki.

²²A Nyasaye, a malo mondo ihul wachni iwuon, kiparo kaka joma kiayi jari pile odiechieng’ duto.

²³Wiyi kik wil gi koko mar mirima ma wasiki goyo sa ka sa.