Read luo Zaburi 77 Bible Online

Zaburi 77 - luo bible

Zaburi 77

¹Aywak ni Nyasaye matek. Ee, aywak matek, kendo owinja.

²E kinde mane anie chandruok to ne alamo Ruoth. Otieno duto ne ating’o bedena malo, ka alemo, to chunya ne ok nyal yudo kue.

³Kane aparo Nyasaye, to ne ahum nono, kendo kata kane aparo matut, to chunya nyosore anyosa.

⁴Nyasaye ne ok we anindi, kendo ne aparora ma ok anyal wuoyo.

⁵Ne aparo ndalo mosekadho. Higni machon bende ne aparo.

⁶Otieno duto nasiko ka aparo mana kamano. Ne aparo matut, kapenjora niya,

⁷“Ruoth biro dagiwa nyaka chieng’ koso? Bende nochak ohera kendo?

⁸En adieri ni ng’wonone orumo chutho? Koso singruok mare ti oweyo?

⁹Wi Nyasaye osewil gi bedo mang’won koso? Koso mirima osemiyo oweyo kecho ji?”

¹⁰Kane aseparo mago duto, ne awacho niya, “Gima litna moloyo en ni Nyasaye koro onge gi teko.”

¹¹A Ruoth Nyasaye, anahul timbeni madongo. Adier, anapar honni mane itimo e kinde mokadho.

¹²Anapar gik moko duto ma isetimo. Ee, anapar timbenigo matut.

¹³Gik moko duto mitimo ler, yaye Nyasaye. Onge Nyasaye moro maduong’ ka in.

¹⁴In e Nyasaye matimo honni. Ne inyiso tekoni maduong’ e kind ogendini,

¹⁵kane ireso jogi ma nyikwa Jakobo kod nyikwa Josef.

¹⁶A Nyasaye, kane pige oneni, to ne gidoko maluor, kendo kude mag nam nowalo.

¹⁷Boche polo nokelo koth maduong’, kendo polo noriadore, ka mil koni gi koni.

¹⁸Adier, polo noriadore malich e yamb kalausi, mi omenyo piny duto. Piny bende notetni kendo oyiengni.

¹⁹A Nyasaye, niwuotho, king’ado nam matut, to ger tiendi ne ok nyal ne.

²⁰Ne itayo jogi ka jokwath, ka gin e lwet Musa gi Harun.