Read luo Zaburi 83 Bible Online

Zaburi 83 - luo bible

Zaburi 83

¹A Nyasaye, kik iling’ aling’a, ma ok itimo gimoro!

²Neye kaka wasiki goyo koko ka piem kodi, kendo kaka joma mon kodi ng’anyoni!

³Gitimo cheno maling’ ling’ mondo gihiny jogi. Adier, gidwaro hinyo joma ikawo ka mwanduni.

⁴Giwacho niya, “Watiekuru ogandagi, mondo wich owil gi Israel chuth!”

⁵Giwinjore e weche ma giwacho, kendo giriworeni giduto.

⁶Gin jo-Edom gi jo-Ishmael gi jo-Moab gi jo-Hagri,

⁷kaachiel gi jo-Gebal gi jo-Amon gi jo-Amalek gi jo-Filistia kod jo-Turo.

⁸Jo-Asuria bende josetimo kodgi winjruok mondo okony nyikwa Lut.

⁹ A Nyasaye, timnigi kaka ne itimo ni jo-Midian, kendo kaka ne itimo ni Sisera gi Jabin e aora Kishon.

¹⁰Ne oneggi Endor, mi ringregi odong’ katop kuno,

¹¹ Tim ni jotendgi mag lweny kaka ne itimo ni Oreb gi Zeeb, kendo lo ruodhgi duto, kaka niloyo Zeba gi Zalmuna,

¹²mane jowacho niya, “Wabiro kawo piny Nyasaye mondo odok marwa.”

¹³A Nyasacha, kegi! Ee, kegi mana ka mihudhi ma yamo tero!

¹⁴Kaka mach wang’o bungu, kata kaka ligek mach kakni e gode,

¹⁵e kaka mondo iriembgi gi kalausi, kendo mondo ibwoggi gi kalausi mager.

¹⁶A Ruoth Nyasaye, migi wichkuot maduong’ nyaka chop gidwog iri.

¹⁷Mad logi, kendo kihondko makgi nyaka chieng’, mi githo gi wichkuot maduong’.

¹⁸Kamano mondo ging’e, A Ruoth Nyasaye, ni in kende e Ruoth Maduong’ e piny ngima.