Read luo Zaburi 84 Bible Online

Zaburi 84 - luo bible

Zaburi 84

¹A Ruoth Nyasaye Manyalo Gik Moko Duto, mano kaka ahero Hekalu mari,

²kendo mano kaka agombo ni mondo abed kuno! Agombo bedo e laru mar Hekalu mar Ruoth Nyasaye, kendo awer matek gi ilo ni Nyasaye mangima.

³Kata winj abang’ chieth osegero utegi e Hekaluni. Opija bende nigi kar dakgi giwegi kanyo, kama gipidhoe nyithindgi machiegni gi kendoni mar misango. A Ruoth Nyasaye Manyalo Gik Moko Duto ma Ruodha kendo Nyasacha,

⁴mano kaka joma odak e Hekalu mari gin johawi! Pile gipaki gi wer.

⁵Mano kaka joma yudo tekogi kuomi gin johawi! Ee, joma keto chunygi kuom dhiyo got Sayun gin joma oguedhi adier.

⁶Ka gikadho e holo motwo, to holono lokore thidhya, kendo kodh opon kelone gueth.

⁷Teko medore ni jogo ameda, ka gidhi nyime gi wuodhgi. Gibiro neno Nyasach nyiseche e got Sayun!

⁸A Ruoth Nyasaye Manyalo Gik Moko Duto, winj lemona. Chik iti, yaye Nyasach Jakobo.

⁹A Nyasaye, guedh ruodhwa ma ritowa en e ruoth ma iseyiero, mowir gi mo.

¹⁰Odiechieng’ achiel ma ng’ato obedogo e Hekalu mari, ber moloyo ndalo gana gi gana mobedogo kamoro nono. Ber mondo achung’ kata mana e dhoranga od Nyasacha, moloyo dak e miech joricho.

¹¹Ruoth Nyasaye e ohinga ma wageng’orego kendo e okumbawa. En ema oguedhowa gi ng’wono kod duong’. Ok otuon joma timo gik makare gimoro amora maber.

¹²A Ruoth Nyasaye Manyalo Gik Moko Duto, mano kaka joma ogeno kuomi gin johawi!