Read luo Zaburi 85 Bible Online

Zaburi 85 - luo bible

Zaburi 85

¹A Ruoth Nyasaye, iseguedho pinyi, kendo isemiyo nyikwa Jakobo ochako dhi nyime maber.

²Iseweyo ni jogi richogi, kendo iseng’wononigi kuom timbegi mamono.

³Ne iweyo kecho kodgi, mi chunyi olendo kuom mirima mager mane in go.

⁴A Nyasaye Jawarwa, duogwa iri, mondo iwe sin kodwa.

⁵Ibiro kecho kodwa nyaka chieng’ koso? Koso mirimbi biro siko nyaka karang’o?

⁶Wan jogi, yie idwognwa tekowa mondo wapaki.

⁷A Ruoth Nyasaye, reswa, kinyisowago ni iherowa gi hera mosiko.

⁸Achiko ita ni gima Ruoth Nyasaye wacho. Osingore ni obiro kelonwa kue, wan joge owuon, ka ok wadok e timbewa manono.

⁹Adier, oikore mar reso jogo ma miye luor, kendo duong’ne maler biro siko e pinywani.

¹⁰Hera gi adiera biro riwore kanyakla. Tim makare kod kue bende biro bedo kaachiel.

¹¹Luor ma dhano oluorogo Nyasaye biro chopo malo, kendo adiera mar Nyasaye biro e piny koa e polo.

¹²Ruoth Nyasaye biro miyo wadhi nyime maber, kendo pinywa biro nyago cham mogundho!

¹³Tim makare biro telo e nyim Ruoth Nyasaye, kendo biro losone yo mondo oluw.