Read luo Zaburi 86 Bible Online

Zaburi 86 - luo bible

Zaburi 86

¹A Ruoth Nyasaye, winj ywakna mondo idwoka nikech adhier, kendo achando ng’ama dikonya.

²Resa e tho, nimar ayie kuomi. Adier, konya, nikech an jatichni, kendo ageno kuomi.

³A Ruoth Nyasaye, in e Nyasacha, omiyo kecha. Alami odiechieng’ duto pile.

⁴Chunya mondo obed mamor, yaye Ruoth Nyasaye, nimar in ema aywakni

⁵A Ruoth Nyasaye, iber kendo ing’wono ni ji, bende inyiso herani mogundho ni ji duto maywakni.

⁶Chik iti ni lemona, A Ruoth Nyasaye. Adier, winj ywakna mondo ikonya.

⁷Aluongi e kinde ma an e chandruok, nimar ang’eyo ni iwinjo lemona.

⁸A Ruoth Nyasaye, onge Nyasaye moro ma romo kodi, kata ma nyalo timo gik ma itimo.

⁹ Ogendini duto ma isechueyo, A Ruoth Nyasaye, biro kuloreni, kendo gibiro miyo nyingi duong’,

¹⁰nimar in kendi Nyasaye, ema iduong’, kendo in ema itimo gik malich ma iwuoro.

¹¹A Ruoth Nyasaye, nyisa yori mondo awuothie gi adiera. Puonja kaka daluori gi chuny achiel.

¹²Abiro paki gi chunya duto, A Ruoth Nyasacha, bende abiro miyo nyingi duong’ nyaka chieng’,

¹³nikech hera miherago lich, kendo nimar iseresa e bur matut mar tho.

¹⁴A Nyasaye, josunga ma timbegi richo dwaro nega. Gin joma ok dewi.

¹⁵Ruoth, in e Nyasaye ma jang’wono kendo makecho ji. Iyi ok wang’ piyo, kendo inyiso adiera ni gi herani mosiko.

¹⁶Duog ira mondo ikecha. Meda teko, kendo resa.

¹⁷A Ruoth Nyasaye, nyisa gima dimi ang’e ni ihera, mondo joma mon koda oyud wichkuot ka gineno ni isekonya, kendo imiya yueyo.