Read luo Zaburi 88 Bible Online

Zaburi 88 - luo bible

Zaburi 88

¹A Ruoth Nyasaye ma Jawarna, aywakni odiechieng’ gotieno duto pile.

²Winj lemona, kendo chik iti ni ywakna mondo ikonya,

³nikech thagruok mang’eny osemaka, kendo an mana e lak tho.

⁴An achiel kuom jogo duto machiegni tho, kendo tekona duto orumo.

⁵Ojwang’a e kind joma otho. Adier, achalo gi ng’ama onegi, monindo ei liel, ma wiyi osewilgo chuth, kendo ma koro ok nyal konyo.

⁶Isewita e pier bur piny. En bur motimo mudho, kendo matut miwuoro!

⁷Ikuma marach kikecho, kendo apaka mag mirimbi nega.

⁸Isemiyo osiepena oringa. Adier, isemiyo achalo ni osiepena, gima bwogogi. Olorna, kendo ok anyal wuok.

⁹Wengena kethore nikech chandruok ma an go. A Ruoth Nyasaye, aluongi pile, kendo alami kating’o bedena malo.

¹⁰Bende itimo honni ni joma otho adier? Koso joma otho nyalo paki?

¹¹Bende joma otho winjo wach herani mosiko? Koso bende giwinjo wach ng’wononi e piny joma otho?

¹²Bende honni mitimo nenore kama otimo mudhono? Koso bende ng’wononi nenore e piny ma wich owilgono.

¹³A Ruoth Nyasaye, aluongi mondo ikonya. Alami okinyi kokinyi.

¹⁴Ere gima omiyo idaga, A Ruoth Nyasaye? Ang’o momiyo ipandona wang’i?

¹⁵Chakre tinna aseyudo chandruok machiegni nega. Thagruok misemiya, osetieko tekona.

¹⁶Mirimbi mager nega dwaro nyuma ka apaka, kendo monj malich misemonjago omiya luoro ma dwaro nega.

¹⁷Odiechieng’ duto gilwora mana ka ataro, kendo gigeng’ona koni gi koni.

¹⁸Isemiyo koda ka osiepena mohera oringa. Tinde mudho kende e osiepna modong’!