Read luo Zaburi 89 Bible Online

Zaburi 89 - luo bible

Zaburi 89

¹A Ruoth Nyasaye, abiro pako hera mari gi wer, kendo abiro hulo adiera mari ni tienge duto nyaka chieng’.

²Ang’eyo ni herani osiko, kendo ni adiera mari ogurore mochwere ka polo.

³Ne iwacho niya, “Asetimo singruok gi Daudi, jatichna ma aseyiero, mowir gi mo,

⁴ ka anyise ni kothe biro bet ruoth ndalo duto, kendo ni anarit lochne nyaka chieng’.”

⁵Polo pako honni mitimo. A Ruoth Nyasaye, malaika magi pako adiera mari.

⁶Onge Nyasaye e polo machal kodi, yaye Ruoth Nyasaye. Ooyo, onge moro marom kodi.

⁷In ema malaika miyi luor e buch polo. Ee, oluori moloyo malaika duto man buti.

⁸A Ruoth Nyasaye Manyalo Gik Moko Duto, ere ng’ama romo kodi gi duong’? Itimo gik moko duto gi adiera, yaye Ruoth Nyasaye.

⁹In gi loch kuom nam, kendo ikueyo apaka mage madongo.

¹⁰Ne igoyo Rahab ma ondieg nam, minego. Wasiki bende ne iloyo gi tekoni mang’ongo.

¹¹Polo gi piny gin magi. In ema ne ichueyo piny kod gik moko duto manie iye,

¹²bende ne iketo nyandwat kod milambo. Got Tabor gi got Hermon werni gi mor.

¹³Mano kaka iratego! Adier, mano kaka tekoni ng’eny!

¹⁴Lochni otenore kuom tim makare kod ng’wononi. Hera gi adiera opong’o gik moko duto mitimo.

¹⁵Joma lami gi wer, kendo modak e ler mar ng’wononi, gin johawi.

¹⁶Pile giil odiechieng’ duto nikech in. Adier, timni makare miyogi mor.

¹⁷Imiyowa loch madongo. Ee, ng’wononi ema omiyo walocho,

¹⁸nimar ne iyeronwa jarit. Adier, in Ng’ama Ler mar Israel, ema ne imiyowa ruoth.

¹⁹Chon nifwenyori ni jogi, miwachonigi niya, “Aseketo osimbo ewi jalweny marahuma.

²⁰ Aseyiero Daudi jatichna, mi awire gi mo ka akete ruoth.

²¹Abiro bedo kode kinde duto mondo akonye, kendo tekona biro miyo obedo motegno.

²²Wasike ok nomonje mi nyale, kata mana jaricho ok noloye.

²³Abiro tieko wasike, mi aneg jogo duto mapiem kode.

²⁴Pile abiro here, kendo abiro bedone mang’won, bende abiro miye locho.

²⁵Anayar tong’ pinye, chakre nam Mediterenia nyaka aora Yufrate.

²⁶Enowachna niya, ‘In e wuora kendo Nyasacha. Bende in e lwandana ma ageng’orae.’

²⁷ Abiro miyo obed wuoda makayo, kendo ruoth maduong’ moloyoe ruodhi duto.

²⁸Anahere mochwere, kendo anarit singruok mane atimo kode nyaka chieng’.

²⁹Pile nyakware moro nobed ruoth, kendo lochne nobed mogurore ka polo.

³⁰To ka nyikwaye ok omako chikena kendo ok owuotho e yorena,

³¹bende ka ok gidewo wechena,

³²to anakumgi kuom richogi, kendo anasandgi kuom timbegi mamono.

³³To ok nawe mak ahero koth Daudi kata weyo mak arito singruok mane atimone.

³⁴Adier, ok naketh winjruokna kode, ka ok achopo gima ne awacho.

³⁵Ne asingora gi nyinga maler dichiel kendo mogik niya, ‘Ok anawuond Daudi.

³⁶To pile enobed gi nyikwayo kendo lochne nosik nyaka chieng’.

³⁷Enobed mogurore ka due, ma en janeno maradier e kor polo.’ ”

³⁸To eka Nyasaye pod isiko ikecho akecha gi ruoth mane iyiero, mowir gi mo! Isejwang’e, mi iweye!

³⁹Iseketho singruok mane itimo gi jatichni, kendo isewito osimbone e buru!

⁴⁰Isemuko ohinga mar dalane, mi iweyo kuondene mag siro lweny kokethore.

⁴¹Ji duto makadho kanyo yako gige, kendo ogendini mokiewo gi pinye goyone siboi.

⁴²Isemiyo wasike olocho, mi giduto gibedo mamor.

⁴³Isemiyo gi lwenjene olokore gik manono, mi oloye e lweny.

⁴⁴Isemaye ludhe mar loch, kendo isemuko kom duong’ne.

⁴⁵Isemiyo odoko moti ka ndalone podi, kendo isemiye wichkuot maduong’.

⁴⁶A Ruoth Nyasaye, ibiro pando wang’i nyaka karang’o? Koso ibiro pondo nyaka chieng’? Nyaka karang’o ma mirimbi biro wang’ie ka mach?

⁴⁷Parie kaka ngima dhano chiek, kendo kaka ji duto nichueyo ni nyaka tho.

⁴⁸Ere ng’ama nyalo dak nyaka chieng’, mak otho? Koso en ng’a ma disir tho, mak odhi e liel?

⁴⁹A Ruoth Nyasaye, tinde ere timbeni mane inyisowago ni iherowa? Ere gik mane isingori ni nitim ni Daudi?

⁵⁰A Ruoth Nyasaye, winjie kaka joma mon kodi yanyo ruoth mane iyiero mowir gi mo.

⁵¹Giyanye kamoro amora modhiye!

⁵²Wapakuru Ruoth Nyasaye nyaka chieng’. Amin.