Read luo Zaburi 9 Bible Online

Zaburi 9 - luo bible

Zaburi 9

¹A Ruoth Nyasaye, abiro paki gi chunya duto, ka ahulo gik madongo duto ma isetimo.

²Abiro wer gi ilo nikech in. A Nyasaye Maduong’ Moloyo, abiro pako nyingi gi wer!

³Wasika dok chien ka gineni. Gipodho piny kendo githo.

⁴In jang’ad bura kare. Iseng’adona bura maber, ka ibet e kom duong’ni.

⁵Isekwero ogendini ma ok ong’eyi, kendo itieko joricho, mi irucho nyinggi oko nyaka chieng’.

⁶Wasikwa orumo chuth, bende iseketho miechgi, kendo wich owil kodgi mochwere.

⁷Ruoth Nyasaye e ruoth nyaka chieng’. Oseketo kome mar ng’ado bura.

⁸Orito piny gi adiera, kendo ong’ado ni ji bura kare.

⁹Ruoth Nyasaye ema joma ithiro ringo tony kuome, kendo en e kar kue e kinde mag chandruok.

¹⁰A Ruoth Nyasaye, joma ong’eyi keto genoo margi kuomi, nimar in ok ijwang’ ng’ato ang’ata moringo obiro iri.

¹¹Pakuru Ruoth Nyasaye marito piny kodak Sayun. Nyisuru ogendini duto gik madongo ma osetimo.

¹²Nyasaye paro jogo ma ithiro, bende wiye ok wil gi ywakgi. En e jachul kuor, kendo okumo joma timonigi marach.

¹³A Ruoth Nyasaye, bedna mang’won. Neye kaka joma mon koda thaga! Resa e lak tho, A Ruoth Nyasaye,

¹⁴mondo achung’ e nyim jo-Jerusalem, ka anyisogi gik moko duto momiyo apaki. Abiro bedo mail nikech iseresa.

¹⁵Ogendini ma ok ong’eyo Nyasaye osekunyo bur monyumoree. Ee, gisechiko obadho, mi gin giwegi ema gimokoe.

¹⁶Ruoth Nyasaye osefwenyore kuom ng’ado bura kare, to joricho osenyumore e timbegi giwegi.

¹⁷Piny joma otho ema joricho duto ochomo, kendo e kar jogo duto modagi Nyasaye.

¹⁸Nyasaye ok nojwang’ jachan, kendo ok notiek geno mar joma ithiro.

¹⁹A Ruoth Nyasaye, bi! Kik iwe dhano loyi! Kel ogendini ma ok ong’eyi e nyimi mondo iyal.

²⁰Migi gibed maluor, A Ruoth Nyasaye, kendo nyisgi ni gin mana ji.