Read luo Zaburi 90 Bible Online

Zaburi 90 - luo bible

Zaburi 90

¹A Ruoth Nyasaye, nyaka nene isebedonwa kar dak.

²Kane pok ochue gode, kata kane piny pok obetie, in e Nyasaye ma nyaka nene kendo manyaka chieng’.

³Idwoko dhano e lowo, kiwacho niya, “Doguru un koth dhano.”

⁴ Higni alufu achiel rumoni piyo mana ka ndalo achiel, kata mana ka seche mag otieno manenore ni chiek.

⁵Iywoyo ji, mana ka ohula maywoyo gik moko,, kendo lalgo nono. Gikadho piyo mana ka lek. Gichalo buya ma loth gokinyi,

⁶kendo dongo, mi gol maua to bang’e ner, kendo tho godhiambo.

⁷Mirimbi osebwogowa, motiekowa!

⁸Iketo richowa mopondo e nyimi kamaa inenogie.

⁹Mirimbi ong’ado ndalowa machiek, omiyo ngimawa orumo ka yamo makudho.

¹⁰Hik dhano gin piero abiriyo, to ka ng’ato nigi ngima maber, to onyalo dak higni piero aboro. To hignigo duto kelonwa mana chandruok gi kuyo. Ngimawa rumo piyo, kendo walal nono.

¹¹Ere ng’ama ong’eyo teko duto mar mirimbi? Koso ere ng’ama ong’eyo luoro ma gero mari kelo?

¹²Kuom mano, puonjwa wakwan ndalo ngimawa, mondo wabed gi rieko.

¹³Biro bet kinde marom nadi ka pok chunyi olendo, A Ruoth Nyasaye? Yie ikechwa, wan jotichni.

¹⁴Pong’ chunywa gi hera mosiko okinyi kokinyi, mondo wawer kendo wabed mamor kuom ngimawa duto.

¹⁵Isemiyowa thagruok maduong’ kuom higni mang’eny, to koro miwa mor maduong’ maromre gi thagruok mane wabedogono.

¹⁶Nyiswae tijeni madongo, wan jotichni, mondo nyithindwa bende one duong’ni maler.

¹⁷A Ruoth Nyasachwa, guethni mondo obed kodwa, kendo ikonywa e gik moko duto ma watimo, mondo wadhi maber e tijewa duto.