Read luo Zaburi 91 Bible Online

Zaburi 91 - luo bible

Zaburi 91

¹Ng’at madhi ir Nyasaye Maduong’ Moloyo mondo oyud resruok kata ngat mosiko e tipo mar Ng’at Manyalo Gik Moko Duto,

²nyalo wacho ni Nyasaye niya, “In e kar konyruokna kendo ohingana, In e Nyasacha ma ageno kuome.”

³Nyasaye nokonyi adier kuom masiche mopondo, kendo kuom tuoche manego ji.

⁴Enoumi gi buombene, mi iyue e tipo gi kue. Adierane biro bedoni ka okumba kod gigi mag lweny.

⁵Ok inibed kiluoro masira moro gotieno, kata gima nyalo hinyi apoya godiechieng’.

⁶Bende ok iniluor tho magoyo ji ka piny olil, kata tuoche manego ji ka piny ler.

⁷Ji gana nyalo podho buti, Ee, ji gana gi gana nyalo tho machiegni kodi, to in onge gima nyalo hinyi.

⁸Inirang aranga mi ine kaka joricho yudo kum.

⁹Ne ikawo Nyasaye Maduong’ Moloyo, kaka kar konyruokni kendo kar dakni,

¹⁰omiyo masira moro ok nomaki, bende kata mana gimoro marach ok nobi machiegni gi dalani.

¹¹ Nyasaye biro keto malaikane mondo oriti, kendo okonyi kamoro amora midhiye.

¹² Ginitayi gi lwetgi, mondo kik ichwany tiendeni e kite.

¹³ Ininyon sibuoche gi thuonde. Koda ka sibuoche mager kod thuonde malich man gi kwiri.

¹⁴Nyasaye owacho niya, “Anawar joma ohera, kendo nakony jogo mong’eya.

¹⁵Ka giywakna, to nadwokgi, kendo ka gin e chandruok, to anabed kodgi. Anaresgi, kendo anami gibed joma oluor.

¹⁶Anami gidag aming’a, mondo gibed mamor gi warruok ma amiyogi.”