Read luo Ngeche 14 Bible Online

Ngeche 14 - luo bible

Ngeche 14

¹Mon mariek ema utegi obidhore, to mon mofuwo ketho utgi aketha.

²Ng’at makare oluoro Ruoth Nyasaye. Ng’at ma achach to ochaye achaya.

³Weche ng’at mofuwo kelone mana kum Weche ng’at mariek to konye e thagruok.

⁴Kionge gi dhok ma puroni to ok iyud chiemo maber, to ka in gi dhok ma puroni to ibedo gi cham mang’eny.

⁵Janeno malong’o pile wacho adiera. Janeno ma mibadhi to wacho mana miriambo lilo.

⁶Ng’at ma jasunga ok nyal bedo mariek. Ng’at ma weche donjone to puonjore piyopiyo.

⁷Bed mabor gi joma ofuwo, nikech gionge gi gima digipuonji.

⁸Rieko mar ng’at mariek, nyise yo makare monego oluw, to fup joma omemore, miyo gibayo yo.

⁹Joma ofuwo ok dew kata ka gitimo richo. Joma beyo to dwaro ni mondo ong’wonnigi.

¹⁰Chuny ng’ato ema ong’eyo gima litne, kata mor ma en go. Ng’at machielo to ok nyal ng’eyo.

¹¹Od jaricho iketho, to od ng’at makare dhi nyime maber.

¹² Yo ma ng’ato paro ni ber, nyalo mana tere e tho.

¹³Bwonjo mar ng’ato nyalo pando parruok manie chunye, to ka morne orumo to chunye odong’ mana ka lit.

¹⁴Ng’at marach yudo gima oromo kode. Ng’at makare bende yudo pok kuom timbene.

¹⁵Ng’at ma riekone tin yie gimoro amora mowinjo. Ng’ama riek to ong’eyo pogo weche.

¹⁶Ng’at mariek tang’, kendo loko dieng’eye ni richo Ng’ama ofuwo to mwomore amwoma nikech ok oluoro gimoro.

¹⁷Ng’at ma iye jawang’ piyo timo gik mofuwo. Ng’at mariek to hore mos.

¹⁸Joma omemore yudo gima owinjore gi fupgi. Joma riek to riekogi medore ameda.

¹⁹Joricho nokulre ni joma kare, kendo ginikuechi e dhoutgi.

²⁰Onge ng’ama ohero jachan. Jomwandu to nigi osiepe mathoth.

²¹Ka idwaro bedo mamor, to kony jochan, nimar charo ji en richo.

²²Ka ichano timo marach to ibiro lal nono, to ka ichano timo maber to ji nogeni kendo nomiyi luor.

²³Tich ema kelo chiemo. Thoro wach to kelo mana chan.

²⁴Osimb joma riek en mwandu. To gima joma ofuwo sidho gin mana fupgi.

²⁵Janeno ma wacho adier reso ji e tho, to janeno ma riambo ketho bura.

²⁶Ng’at moluoro Ruoth nyasaye nodag gi kue kaachiel gi joode.

²⁷Luoro Ruoth Nyasaye chalo gi soko mar ngima nikech oreso ji e tho.

²⁸Ruoth ma joge ng’eny ema nigi huma. Ruoth ma joge nok to podho.

²⁹Ng’at ma iye ok wang’ piyo ema nigi rieko mang’eny, to ng’at ma mirimbe liet nyiso mana fupe.

³⁰Chuny mokue ema miyo del bedo mangima. Nyiego to chalo adhola ma ketho del.

³¹Ng’at ma sando jachan, to chayo mana Nyasaye mane ochueye, to ng’at ma kecho jachan ema miyo Nyasaye duong’.

³²Timbe mamono mag joricho ema miyo orumo. Ng’at makare to yudo resruok kuom timne malong’o.

³³Rieko nie chuny ng’at ma weche donjone. Joma ofuwo to kia rieko.

³⁴Tim makare ting’o oganda malo. Richo to ketho nying oganda.

³⁵Ruoth mor mana gi jatichne ma tiyo maber, to iye wang’ gi jatich ma utho tich.