Read luo Ngeche 15 Bible Online

Ngeche 15 - luo bible

Ngeche 15

¹Dwoko mamuol ema kueyo mirima, to dwoko makwiny jimbe ajimba.

²Ka ng’at mariek wuoyo to wachne lombo ji. Ng’at mofuwo to rodho weche maonge tich.

³Ruoth Nyasaye neno gik matimore kamoro amora. Orango joma beyo gi joma richo mana machalre.

⁴Weche mang’won kelo ngima. Weche maricho to nyoso chuny.

⁵Ng’at mofuwo ochayo puonj wuon mare, to ng’at mariek winjo kikwere gimoro.

⁶Joma kare nigi mwandu mang’eny e miechgi, to gik ma joricho yudo kelonigi mana chandruok.

⁷Lew ng’at mariek lando rieko. Ng’at mofuwo to wechene obam.

⁸Ruoth Nyasaye mor ka joma ber lame, to omon gi misengni ma joricho chiwone.

⁹Ruoth Nyasaye mon gi timbe joma richo, to ohero joma timo gik makare.

¹⁰Ng’at mobaro moweyo yo makare biro yudo kum malit, kendo ng’at modagi ni ok kwer biro tho.

¹¹Ruoth Nyasaye ong’eyo gik matimore kata mana e piny joma otho. Koro ere kaka dhano dipandne paro manie chunye?

¹²Ng’at ma jasunga ok dwar mondo okwer, omiyo ok odhi ir joma riek mondo ong’adne rieko.

¹³Ka ng’ato mor, to obwonjo. Ka en gi parruok to chunye nyosore.

¹⁴Ng’at ma weche donjone dwaro puonjruok, to joma ofuwo mor amora gi fupe.

¹⁵Ngima mar jachan en thagruok mochwere. Chuny motegno to mor amora pile.

¹⁶Ber bedo jachan moluoro Ruoth Nyasaye moloyoo bedo gi mwandu makelo chandruok.

¹⁷Ber chamo alot kama oherie, moloyo chamo ring’o malit kama ochayie.

¹⁸Ng’at ma iye wang’ piyo ero miero, to ng’at ma hore mos kelo kue.

¹⁹Yo ma jasamwoyo luwo otimo kudho lilo. Ng’at ma ratego to luwo yo maler.

²⁰Wuowi mariek miyo wuon mare mor. Ng’at ma charo min to ofuwo.

²¹Joma ofuwo mor amora gi fupgi, to ng’at mariek timo mana gima ber.

²²Ka onge jong’ad rieko, to ji ok tim gik ma gichano, to ka jong’ad rieko ng’eny, to gik ma gichano dhi maber.

²³Ka ng’ato odwoko wach maber, to obedo mamor. Adier, wach mowinjore gi sane, ber manade!

²⁴Ng’at mariek idho yo matere e ngima, to ok oluw yo maridore kochomo tho.

²⁵Ruoth Nyasaye biro ketho miech josunga, to enorit mwandu mag mond liete.

²⁶Ruoth Nyasaye mon gi paro maricho, to weche mang’won long’one.

²⁷Ng’at ma gombo bedo gi mwandu e yor miganga keto joode e chandruok, to ng’at modagi chamo asoya nodag aming’a.

²⁸Joma beyo paro matut kapok odwoko wach. Joma timbegi richo to dwoko wach piyopiyo, kendo wechegigo kelo chandruok.

²⁹Ka joma kare lemo, to Ruoth Nyasaye winjo. Joricho to ok dew.

³⁰Wang’ mamor duogo chuny, kendo wach maber miyo del bedo mangima.

³¹Ng’at ma chiko ite kikwero bedo e kanyakla mar joma riek.

³²Ng’at ma tamore puonj hinyore kende owuon, to ng’ama yie kikwero medo bedo mariek.

³³Luoro Ruoth Nyasaye puonjo ji rieko, kendo bedo mamuol kelo luor.