Read luo Ngeche 19 Bible Online

Ngeche 19 - luo bible

Ngeche 19

¹Ber bedo jachan ma timne kare, moloyo bedo jamoko ma wechene obam.

²Ng’at maonge gi rieko to gombo gik moko, ok nyal dhi nyime maber. Jarikni jamuod nyoyo gi kuoyo.

³Ng’at mofuwo kethore kende owuon, to bang’e owacho ni Ruoth Nyasaye ema otimone kamano.

⁴Jomwandu pile yudo osiepe mang’eny. Jochan to kata mana osiepe manok ma gin-go ringo weyo.

⁵Janeno ma jamriambo ok nyal tony mak okum. Adier, ng’at ma wacho miriambo lilo ok tony.

⁶Ng’ato ka ng’ato temo mondo joma dongo ohere, kendo ng’ato ka ng’ato wacho ni en osiep ng’ama bade lach.

⁷Ka omine jachan duto ochaye, osiepene to koro dijwang’e machal nadi! Kata obedo ni otemo matek mondo oyud osiep, to ok onyal yudo.

⁸Ng’at ma dwaro rieko rito ngimane maber, kendo ng’at maparo gima osepuonjore dhi nyime kare.

⁹Janeno mariambo ok nyal tony mak okum. Ng’at ma kamano nolal nono.

¹⁰Joma ofuwo ok owinjore dag maber. Wasumbni bende ok owinjore bed gi loch kuom jodong gweng’.

¹¹Ng’at mariek, iye ok wang’ piyo. Ka ng’ato otimoni marach, to en gima ber moloyo ka ifwayo.

¹²Ruoth ma mirima omako chalo gi sibuor maruto, to ka omor kodi, to morneno chalo koth machue.

¹³En masira bedo wuon wuowi mofuwo. Dhako ma ralep bende chalo gi pi maton ma ok chogi.

¹⁴Dala kod mwandu ema wuon nyathi weyone. Dhako mariek to Ruoth Nyasaye ema chiwo.

¹⁵Nindo mit ni jasamwoyo, to ng’at makamano kech biro nego.

¹⁶Rit chike Ruoth Nyasaye mondo idag aming’a, nikech kichayogi to initho.

¹⁷Ka imiyo jachan gimoro, to ichalo ng’at ma holo Ruoth Nyasaye, nikech Ruoth Nyasaye nodwoknigo.

¹⁸Ka nyithindi oketho to puonjgi gi chwat ka pod gitindo ma ginyalo winjoe gimoro. Ka ok itim kamano to ikethogi.

¹⁹Ng’at ma jamrima nyaka ikre owuon ni yudo kum ma mirimbe kelo, nikech ka igole e chandruok makamano dichiel, to ng’e ni ibiro timo kamano pile.

²⁰Chik iti ni rieko ming’adoni, kendo yie mondo opuonji, eka chieng’ moro nibed mariek.

²¹Ng’ato nyalo chano gik mathoth, to dwaro mar Ruoth Nyasaye ema timore.

²²Enn wichkuot bedo jawuoro. Bedo jachan too ber moloyo bedo jamriambo.

²³Luor Ruoth Nyasaye mondo idag aming’a gi kue maonge gima thagi.

²⁴Ng’at ma jasamwoyo luto lwete e tawo, to tero lwete e dhoge tame.

²⁵Josunga nyaka kum mondo joma kia gik moko opuonjre. Ng’at mariek to puonjore apuonja kokwere.

²⁶Ng’at mamon gi wuon, kendo riembo min e dala, kelo wichkuot kod achaya.

²⁷Wuoda, ka iweyo puonjruok, to piyopiyo nono wiyi biro wil gi gik ma iseng’eyo.

²⁸Janeno man gi sadha e chunye ketho bura. Joricho to chadho mana weche mamono.

²⁹Josunga gi joma ofuwo duto biro yudo kum.