Read luo Ngeche 22 Bible Online

Ngeche 22 - luo bible

Ngeche 22

¹Ber bedo gi nying maber, moloyo bedo gi mwandu mathoth. Bende ber bedo ng’at mogen, moloyo bedo gi fedha kata dhahabu.

²Onge pogruok moro e kind jachan gi jamoko, nimar Ruoth Nyasaye nochueyogi giduto.

³Ng’at man gi rieko neno chandruok kabiro, kendo tang’. Ng’at ma riekone tin to mwomore amwoma e chandruok, eka achien oywago ang’e.

⁴Bed ng’ama ok sungre, kendo luor Ruoth Nyasaye, eka iyud mwandu gi luor, kendo idag aming’a.

⁵Obadho kod bugni nie yo ma jaricho luwo, omiyo ka ihero ngimani to bed mabor gi yorno.

⁶Ka ipuonjo nyathi timbe mabeyo ka pod otin, to wiye ok nowil gi timgo e ngimane duto.

⁷Joma odhier gin wasumb jomwandu, kendo kiholo gimoro kuom ng’ato to nyaka idok misumbane.

⁸Ng’at matimo timbe mamono nyaka yud masira, kendo e giko ibiro kume mager.

⁹Ng’at mang’won to noyud gueth, nikech opogo chiembe ni jochan.

¹⁰Ka iriembo ng’at ma jasunga, to wichkuot kod miero gi dhaw orumo.

¹¹Inyalo bedo osiep ruoth kiperogo. Ruoth Nyasaye to ohero mana ng’ama jaadiera.

¹²Orango mondo one ni bura ong’ad kare, to oketho buch ng’at ma jamriambo.

¹³Ng’at ma janyawo budho abudha e dala, kawacho ni sibuor dipo kochame kowuok oko.

¹⁴Terruok en bur matut ma joma Ruoth Nyasaye okechogo nyumoree.

¹⁵Timo gik mofuwo en kit nyathi. Ka ichwade to obiro weyo timbe makamago.

¹⁶Ka ithiro jochan mondo iyud mwandu, kata ka imiyo joma omew chiwo, to in ema ibedo jachan.

¹⁷Chik iti iwinj weche joma riek, kendo ket chunyi mondo imak rieko ma gipuonji,

¹⁸nikech kikanogi e chunyi, kendo kinyalo hulogi gi wiyi, to inibed mamor.

¹⁹Adwaro ni mondo iket genoni kuom Ruoth Nyasaye. Mano emomiyo apuonji wechegi mondo okonyi in iwuon.

²⁰Eri asendikoni ngeche piero adekgi. Giting’o ng’eyo kod rieko maber,

²¹kendo gibiro puonji ng’eyo adiera, mondo idwok wach madiera ni ng’at mane oori.

²²Kik iyak ng’at modhier mana nikech odhier, kendo ka odonj ni ng’at mathagore, to kik ithage,

²³nimar Ruoth Nyasaye nochwak joma kamago, kendo nokum ng’ato ang’ata ma yakogi.

²⁴Kik imak osiep gi ng’ama iye jawang’ piyo, kendo kik ibed e kanyakla mar joma chunygi richo,

²⁵nimar dipo ka iluwo timbegi, mi imoko e obadho marach.

²⁶Kik ichung’ ni ng’ato nono e gowi,

²⁷nikech kotami chulo to wuon gowino nyalo kata mana kawo kitandani!

²⁸Kik iketh kiew machon mane kwereni oketo.

²⁹Ng’at ma ong’eyo tije maber ok ti ni ji ajiya, to tiyo mana ni ruodhi.