Read luo Ngeche 24 Bible Online

Ngeche 24 - luo bible

Ngeche 24

¹Kik nyiego maki gi gik ma joricho nigo, bende kik item bedo osiepgi.

²Nimar gik makelo chandruok ema giketo e chunygi, kendo wechegi duto hinyo ji.

³Mise mar dala maber en mana rieko kod ng’eyo.

⁴Ng’at mariek keto gik moko mabeyo kendo ma nengogi tek e ute.

⁵Bedo mariek ber moloyo bedo ratego, Adier, rieko nigi tich moloyo teko.

⁶Joma chano gik moko malong’o ema kedo lweny maber, omiyo, kidwaro loyo lweny, to nyaka ibed gi jong’ad rieko mathoth.

⁷Ng’at mofuwo ok nyal winjo tiend weche mariek nikech gitut modhiere. Onge gima long’o ma onyalo wacho e bura.

⁸Ka pile ichano timo richo, to ji biro luongi ni andhoga.

⁹Gimoro amora ma ng’at mofuwo chano timo en richo. Ji mon gi ng’at machayo jowetene.

¹⁰Ka tekri orumo chieng’ ma chandruok omaki, to mano nyiso ni tekoni tin.

¹¹Kineno ng’at maa ji dwaro nego, to rese piyopiyo.

¹²Kik iwach ni mano ok tiji, nikech Nyasaye ma pimo chuny ji nopar gima itimono. Bed gi ratiro ni Nyasaye marangi ong’eyo gima itimo. Ochulo ng’ato ka ng’ato moromo gi timbene.

¹³Wuoda, cham mor kich, nikech ober gi del. Kaka pet kich mit e dhogi,

¹⁴e kaka rieko gi ng’eyo bende ber ni chunyi. Ka iyudogi to inidhi nyime maber, kendo nidag aming’a.

¹⁵Kik ichan mayo ng’at makare gire, kata ketho dalane, nikech mano en richo.

¹⁶Ng’at makare nyalo podho ndalo mang’eny, to pod ochako ochung’ achung’a kendo. Jaricho to masira achiel kende ema tieko.

¹⁷Kik ibed mamor ka masira omako jasiki,

¹⁸nono to Ruoth Nyasaye oneno kitimo kamano, mi in ema osin kodi, to oweyo jasikino.

¹⁹Kik iwe timbe joricho thag chunyi, bende kik nyiego maki gi gik ma gin go,

²⁰nimar jaricho onge gi gima ogeno, to tho kende ema ochomogi.

²¹Wuoda, luor Ruoth Nyasaye, kendo luor ruoth ma rito piny. Bed mabor gi joma piem kodgi,

²²nikech joma kamago nyalo lal nono ka diemo wang’. Bende ing’eyo masira ma biro tieko jogo?

²³Wechegi bende gin weche mane joma riek wacho. Ng’ado bura nyakonchiel nikech luoro wang’ en richo.

²⁴Ka jang’ad bura owacho ni ng’at moketho onge gi ketho, to ji duto manie piny kuong’e kendo chaye.

²⁵Jong’ad bura ma kumo joketho, to dhi nyime maber, kendo bedo gi huma.

²⁶Ka ng’ato odwoki gi dwok maratiro, to mano nyiso ni en osiepni maradier.

²⁷Kik igo dala mi iger ot maber kapok iloso puotheni ma miyi chiemo moromi.

²⁸Kik ibed janeno mar miriambo kuom wadu ka onge gima omiyo.

²⁹Kik iwach niya, “Abiro timone mana gima nyocha otimona! Adier, abiro chulone kuor!”

³⁰Ne oyudo awuotho e puothe mag ng’at majasamwoyo kendo ma riekone tin.

³¹Puothenego notimo kuthe kendo ogawore gi buya. Ohinga mane ochielgigo bende nosemukore.

³²Kane arango puothego ne aparo mi ayudo niya,

³³ Ka ng’ato okwakore mondo otim nindoe matin,

³⁴to e sa mapod onindoeno, dhier biro gore kuome apoya, ka jamecho momanore gi gilweny.