Read luo Ngeche 27 Bible Online

Ngeche 27 - luo bible

Ngeche 27

¹ Kik isungri ni gima pok ineno, nikech ok ing’eyo gima biro timore.

²We ji moko ema opaki, kata bed ni gin welo. In kik ipakri kendi.

³Chandruok ma ng’at mofuwo kelo pek moloyo kidi kata kuoyo.

⁴Mirima kwiny, kendo ketho gik moko. Nyiego to rach moloyo!

⁵Kwero ng’ato ratiro ber moloyo here, to ok inyise kethone.

⁶Osiepni, kata ka ogoyi, to otimo kamano nikech oheri. Jasigu to kata ka omosi gi mor, to mosneno oting’o masira.

⁷Ka ng’ato oyieng’ to kata mana mor kich ok odwar. Ka odenyo to kata mana chiemo makech mitne amita!

⁸Ng’at man mabor gi thurgi, chalo mana gi winyo modhi mabor gi ode.

⁹Mo ma iwirruokgo kod poda mang’ue ng’ar miyo ng’ato winjo maber, kendo rieko ma osiep ng’ado miyo chuny bedo motegno.

¹⁰Kik wiyi wil gi osiepni kata mana gi osiepe wuoru, kendo ka in gi chandruok, to kik iring ir owadu mondo okonyi, nikech ng’at modak buti nyalo konyi moloyo owadu modak mabor.

¹¹Wuoda, bed mariek mondo chunya obed mamor, eka abed gi gima ageng’ogo joma chaya.

¹²Ng’at man gi rieko neno chandruok ka biro, kendo tang’. Ng’at ma riekone tin to mwomore amwoma e chandruok eka achien oywago ang’e.

¹³Ng’at mochung’ ni ng’ato nono e gowi onego omak mwandune kar gowino!

¹⁴Ng’at ma moso wadgi matek gokinyi mang’ich chalo mana ng’ama ire.

¹⁵Dhako maralep chalo mana gi kodh ajiki.

¹⁶Ok inyal kwere mi oling’, mana kaka ok inyal ng’eyo yamo. Bende ok inyal kwere mana kaka ok inyal jowo mo maliw gi lweti.

¹⁷Kaka nyinyo piago nyinyo wadgi, e kaka ng’ato bende piago obwongo wadgi.

¹⁸Ng’at maloso yiend olembene maber ema nocham olembegi. Kamano bende e kaka jatich marito ruodhe maber nomi duong’.

¹⁹Kirango pi, to wang’i iwuon ema ineno, kendo kirango chunyi, to in iwuon ema inenori.

²⁰Kaka joma otho ok nyal pong’o Piny Joma Otho, e kaka gombo mar dhano bende ok nyal rumo.

²¹Mach ema itemogo dhahabu kod fedha. Chuny dhano to itemo gi pak.

²²Kata ka igoyo ng’at mofuwo mi both inego, to pod ofuwo afuwa.

²³Rit jambi maber gi rieko kaka inyalo,

²⁴nikech mwandu ok siki nyaka chieng’. Kata mana loch bende ok siki e dhoot achiel kende.

²⁵Ka ibeto lum, mi iweyo lum manyien oloth, kendo ka ichoko ni jambi lum e kor gode,

²⁶eka iniyud yie rombe milosogo lewni, kendo ining’iew lowo gi pesa miyudo kuom dieki.

²⁷Dieki nomiyi chak moromi maber, kaachiel gi joodi kod jotichni manyiri.