Read luo Ngeche 28 Bible Online

Ngeche 28 - luo bible

Ngeche 28

¹Jaricho ringo kata ka onge ng’ama lawe. Ng’at makare to jachir ka sibuor.

²Piny nyalo bedo mogurore kendo motegno ka nitie jotelo mariek. To ka richo nie piny, to jotelo ok ti aming’a.

³Jatelo mathiro jochan chalo gi kodh yamo ma ketho cham.

⁴Joma ok oluoro chik pako joricho. Joma orito chik to kwerogi.

⁵Joma timbegi mono ok ong’eyo adiera, to jogo malamo Ruoth Nyasaye ong’eyo gik moko duto.

⁶Ber bedo jachan ma jaratiro oloyo bedo jamoko ma timbene obam.

⁷Wuowi ma rito chik en ng’ama riek, to ng’at mamako osiep gi joma nono oloyo, kuodo wi wuon mare.

⁸Ka iholo ji gik moko mondo odwokni gi ohala, to ohala miyudono nodog ni ng’at machielo makonyo jochan.

⁹Ka ng’ato ok orito chik, to kata mana lemone Nyasaye mon-go.

¹⁰Ka ichiko ng’at makare gi richo, to in iwuon ema richono nodogni. Ng’at ma onge ketho to yudo gik mabeyo.

¹¹Jamwandu pile paro ni riek to jachan man gi paro matut ong’eyo chuny jamwanduno.

¹²Ka joma kare nigi loch, to ji duto mor, to ka joricho e jotelo, to ji pondo aponda.

¹³Ng’at ma temo pando richone ok nyal dhi maber, to ng’ama hulo richone kendo weyo ema Nyasaye kecho.

¹⁴Ng’at ma pile oluoro Ruoth Nyasaye en jahawi. Ng’ama wiye tek to masira mako.

¹⁵Jatelo marach ma rito joma chandore chalo mana gi sibuor modenyo, kata ka ondiek ma kech nego.

¹⁶Ruoth ma onge gi rieko sando joge asanda, to ruoth mamon gi timbe mobam, to nobed gi loch aming’a.

¹⁷Ng’at ma oneko, ochomo mana kar joma otho. Omiyo ng’ato kik geng’e.

¹⁸Ng’at makare yudo kue. Ng’ama mibadhi to podho.

¹⁹Ng’at mapuro matek nigi chiemo mathoth. Joma timo mana gik manono to nyaka bed maonge gimoro.

²⁰Ng’at makare dak malong’o e ngima maber, to ng’at ma rikni mondo oyud mwandu nyaka yud kum.

²¹Dok ni ng’ato kayiem ok ber. Jong’ad bura moko nyalo dok ni ng’ato mana ni mondo ocham asoya moro maonge ndhathe!

²²Ng’at ma iye lit rikni mondo oyud mwandu. Ok ong’eyo ni chieng’ moro dhier nyalo make.

²³Kikwero ng’ato e wang’e, to nopaki moloyo kipere.

²⁴Ng’at ma kwalo mwandu wuon gi min, to paro ni mano ok rach, chalo mana janek.

²⁵Ng’at ma iye lit kelo miero, to ng’at ma ogeno kuom Ruoth Nyasaye dhi maber.

²⁶Ng’at mogeno kuom riekone owuon en ng’at mofuwo, to ng’at ma luwo puonj joma riek dhi nyime maber.

²⁷Ng’at ma konyo jochan ok chand gimoro, to ng’at ma loko wang’e ok yud gimoro mak mana kuong’.

²⁸Ka joricho nigi loch, to ji pondo aponda, to ka girumo, to joma kare chako kawo loch kendo.