Read luo Ngeche 3 Bible Online

Ngeche 3 - luo bible

Ngeche 3

¹Wuoda, wiyi kik wil gi weche ma apuonji, to pile par gik ma anyisi mondo itim,

²nimar puonjna biro miyo idhi nyime maber, kendo idag aming’a.

³Kik iwe luoro kod adiera lalni, to tuegi e ng’uti, kendo ndikgi e chunyi.

⁴ Ka itimo kamano,, eka Nyasaye nobed mamor kodi, kendo inidhi nyime maber gi ji bende.

⁵Gen kuom Ruoth Nyasaye gi chunyi duto, to kik igen kuom riekoni iwuon.

⁶Par Ruoth Nyasaye e gik moko duto mitimo, eka obiro nyisi yo makare monego iluw.

⁷ Kik iwe chunyi wuondi ni iriek, to luor aluora Ruoth Nyasaye, kendo bed mabor gi richo

⁸Tim ma kamano nochalni gi yath maber, ma thiedho adhondeni, kendo kueyo rem ma in go.

⁹Nyaka imi Ruoth Nyasaye duong’ gi mwanduni, kichiwone cham mabeyoe moloyo ma ikayo e puotheni.

¹⁰Eka dereni nopong’ gi cham mogundho, kendo iniyud divai mang’eny ma onge kama ikanie.

¹¹ Wuoda, kik icha kum ma Ruoth Nyasaye kumigo, kata kik iyi wang’ kokweri,

¹² nikech ng’ama Ruoth Nyasaye ohero ema ochiko, mana kaka wuoro chiko wuode mohero.

¹³Ng’at modoko mariek, kendo man gi ng’eyo en jahawi,

¹⁴nimar rieko ber moloyo fedha, bende en mwandu maduong’ moloyo dhahabu.

¹⁵Chutho, rieko ber moloyo kite ma nengogi tek. Onge gimoro amora maberie minyalo pimo kode.

¹⁶Rieko miyi idak aming’a, bende okeloni mwandu kod luor.

¹⁷Omiyo idak e ngima maber, kendo oteloni mana e yo makare.

¹⁸En ludh ngima ni jogo duto man kode, kendo joma opadore kuome gin johawi.

¹⁹Ruoth Nyasaye nochueyo piny gi riekone, kendo ne oketo polo kare kuom ng’eyo ma en go.

²⁰Riekone ema nomiyo aore omol, kendo ema ne omiyo koth ochue e piny.

²¹Wuoda, rit riekoni kod paroni matut. Kik iwe gilalni.

²²Gibiro miyi ngima maber man gi mor.

²³Bende gibiro teloni gi kue kiwuotho e yo, kendo tiendi ok nochwanyre ngang’!

²⁴Ok nibed maluor ka idhi nindo, kendo ininind maber nyaka piny ru.

²⁵Kik ibed maluor kineno ka joma ofuwo kihondko nego, kata ka masira omako joma timbegi mono,

²⁶nimar Ruoth Nyasaye noriti maber, kendo ok nowe obadho maki.

²⁷Tim ni jochan maber e sa asaya minyalo.

²⁸Ka inyalo konyo wadu kawuono, to kik iwachne niya, “Dogi eka kiny iduog akonyi.”

²⁹Kik ipar timo gimoro marach ni osiepni, nikech en wadu mudakgo.

³⁰Kik idhaw ni ng’ato kayiem nono, ka onge gima rach motimoni.

³¹Kik nyiego maki gi jomahundu bende kik iluw timbegi,

³²nimar Ruoth Nyasaye mon gi joricho, to ogeno joma kare.

³³Okuong’o miech joma timbegi mono, to oguedho miech joma long’o.

³⁴ Wi Ruoth Nyasaye tek ni joma wigi tek, to okecho jogo ma obolore.

³⁵Joma riek noyud luor maduong’, to gima joma ofuwo yudo en mana wichkuot momedore.