Read luo Ngeche 30 Bible Online

Ngeche 30 - luo bible

Ngeche 30

¹Magi e weche moko matut mag Agur wuod Jake: “Nyasaye ok ni koda! Yaye, Nyasaye ok ni koda! Omiyo aol marumo.

²Achalo mana le to ok dhano, kendo aonge gi paro ma dhano nigo.

³Pok apuonjora bedo mariek, omiyo ok ang’eyo gimoro kata matin kuom Nyasaye.

⁴Ere ng’ama osedhi e polo, kendo oseduogo? Koso en ng’a ma oseboyo pige mag nembe e law? Kata en ng’a moseketo tunge piny kuonde ma gintie? Hulna nyinge kod nying wuode, king’eyo.

⁵“Nyasaye rito singruok duto motimo. En okumba ni jogo duto madwaro ni mondo okony.

⁶Kik ihang wach ni, Nyasaye owacho gimoro ma ok owacho, nikech obiro kumi, monyisi ni in jamriambo.”

⁷A Nyasaye, akwayi gik moko ariyo kende. Yie ayudgi kapok atho.

⁸Mokwongo akwayi ni mondo weche mag miriambo gi mag miganga obed mabor koda. Mar ariyo akwayo ni kik iwe abed jamoko, kata kik iwe abed jachan, to chiemo moroma kende ema imiya

⁹nimar ka abedo gi chiemo mathoth, to dipo ka akwedi, to bende ka an jachan, to dipo ka akwelo, mi aketho nyingi, yaye Nyasaye.

¹⁰Kik iwuo marach kuom jatich ni ng’at mondike, nono to okuong’i, mi iyudo chandruok.

¹¹Nitie ji ma kuong’o wuonegi, kendo ma ok mi minegi luor.

¹²Nitie ji moko ma paro ni ler, to adier pok opwodhgi.

¹³Bende nitie ji moko ma paro ni beyo ahinya. Yaye, mano kaka gisungore!

¹⁴Nitie ji moko ma lekegi chalo ligangla. Gichamo joma odhier kod joma chandore duto manie piny, mi gitiek pep.

¹⁵Ji moko nitie ma pile dwaro mondo omigi amiya gik moko, mana kaka chwe bende pile nyodho anyodha remo, to ok yieng’. Bende nitie gik moko adek ma gik moko ok rom. Chutho, gin gik moko ang’wen ma ok nyal wacho ni, “Waromo”.

¹⁶Mokwongo en Piny Joma Otho, mar ariyo en dhako ma migumba, mar adek en lowo motwo ma dwaro koth to mar ang’wen en mach malandore alanda.

¹⁷Ng’at manyiero wuon, kata machayo min mare ka oti, onego achuth cham, kata onego agak lodh wengene!.

¹⁸Nitie gik moko adek motama winjo. Chutho, gin gik moko ang’wen ma tiendgi odhiera ng’eyo.

¹⁹Mokwongo en kaka ongo huyo e kor polo, mar ariyo en kaka thuol mol e lwanda, mar adek en kaka yie kwang’ e dier nam, to mar ang’wen en kaka wuowi sero nyako.

²⁰Kit dhako ma miganga chalo kama: Oterore, bang’e olwokore, eka owacho niya, “Onge gima rach masetimo.”

²¹Nitie gik moko adek ma chando piny. Chutho, gin gik moko ang’wen ma piny ok nyal yiego.

²²Mokwongo en misumba modoko ruodh piny, mar ariyo en ng’at mofuwo moyieng’

²³mar adek en nyako ma kite rach moyudo dichwo, to mar ang’wen en jatich manyako ma omayo dhako mondike dichwo.

²⁴Nitie gik moko ang’wen e piny ma tindo ahinya, to giriek malich!

²⁵Mokwongo gin biye. Gionge gi teko mathoth, to gikano chiembgi e ndalo chwiri.

²⁶Mar ariyo gi apwoche, ma bende nigi teko matin, to oloso gondgi e kind kite.

²⁷Mar adek gin det bonyo. Gionge gi ruodhgi, to giwuotho ka gichanore ka ogend lweny.

²⁸Mar ang’wen to gin olele. Gitindotindo ma inyalo mana mako gi lwedo, to kata kamano, gidak kata mana e ut ruodhi.

²⁹Nitie gik moko adek ma ber rango, kawuotho. Chutho, gin gik moko ang’wen.

³⁰Mokwongo en sibuor. Oratego moloyo le duto, kendo onge gima oluoro.

³¹Mar ariyo, en thwon gweno ma gar ka dwaro gwere gi wadgi. Mar adek en nywok, to mar ang’wen en ruoth matelo ni joge kadhi e lweny.

³²Ka isebedo mofuwo, mi ikawori kendo ichano timo richo, to ling’, mondo ipar maber,

³³nimar kipuoyo chak to iyudo mo, kendo kigoyo um ng’ato to remo chuer, kamano bende, ka iwang’o i ji, to iero miero!