Read luo Ngeche 6 Bible Online

Ngeche 6 - luo bible

Ngeche 6

¹Wuoda, ka isingori ni inichul ni ng’ato gope,

²kata ka singruok moro amora omaki,

³to nyaka itim mana kaka awachoni eka mondo ires ngimani, nikech koro inie teko ng’at machielo! Nyaka iret idhi ir ng’atno mondo ihombe oweyi ibed thuolo.

⁴Kik iwe nindo teri, bende kik ichung’ mondo iyue,

⁵to resri mondo ibwodhri e obadhono, mana ka winyo kata ka mwanda ma yombo jadwar.

⁶Joma nyap onego oneye kaka biye odak, mondo opuonjre rieko.

⁷Biye onge gi jatelo kata ruoth kata jaduong’,

⁸to kata kamano gikano chiembgi e ndalo chwiri, mondo gibi gicham e ndalo oro.

⁹Koro in ng’at ma jasamwoyo, to ibiro budho abudha nyaka karang’o? Koso karang’o ma ibiro chung’ ia kama inindoe?

¹⁰ Iwacho niya, “We akwakra, mondo anindie matin mondi.”

¹¹To e sa mapod inindono, dhier biro monji, mana ka jamecho momanore gi gilweny!

¹²Ji manono ma joricho wuotho awuotha kawacho miriambo.

¹³Seche duto gining’o wang’gi kendo gisimo ji ka giwuondo.

¹⁴Gichano mana timo richo, ka giwacho weche makelo miero.

¹⁵Kuom mano, masiche biro makogi apoya, mi gihinyre malit.

¹⁶Nitie gik moko auchiel ma Nyasaye mon-go. To chutho, gin gik moko abiriyo ma ok onyal yiego:

¹⁷Mokwongo en wang’ maneno gi sunga, mar ariyo en lep mawacho miriambo, mar adek en lwedo machwero remb joma onge ketho,

¹⁸mar ang’wen en chuny maparo timo timbe mamono, mar abich en tielo marikni ka dhi timo richo,

¹⁹mar auchiel en janeno mawacho miriambo lilo, mar abiriyo en ng’at mathuwo osiepe mondo odhaw.

²⁰Wuoda, tim gik ma wuoru nyisi, bende kik idagi puonj meru.

²¹Pile kan wechegi e chunyi maiye,

²²nimar puonjgigo ema notelni ka in e wuoth. Giniriti gotieno, kendo gining’adni rieko godiechieng’.

²³Chike ma kamago gin ler marieny, kendo kwer ma ikwerogo ng’ato kuom gima otimo marach kelo ngima.

²⁴Ginyalo miyo ibed mabor gi mon maricho, kendo itang’ ni weche mamit mag mond jomoko nono.

²⁵Kik chia ma mon-go nigo ywayi, kendo kik wengegi malombo miyi gombo.

²⁶Ng’ato nyalo yudo ohodho gi pesa matin moromo mana makati achiel. Terruok gi chi ng’ato to biro mana tieko ngimani duto!

²⁷Bende diting’ mach e kori, mak lepi owang’?

²⁸Koso bende diwuoth kuom mirni mag mach mak tiendi owang’?

²⁹Mano e kaka ng’at materore gi chi wadgi chalo. Omiyo ng’ato ang’ata motimo kamano ok notony mak oyudo kum.

³⁰Ji ok cha jakech mokwalo chiemo ka kech nego.

³¹Kata kamano, ka ojuke, to nyaka ochul nyadibiriyo. Chutho, nyaka ochul mwandune duto.

³²Kamano bende, ng’at ma terore gi chi ng’ato onge rieko, nimar oketho mana ngimane owuon.

³³Noyud chwat kod wichkuot mosiko.

³⁴Mirima ma mako chwor dhako en mirimb nyiego, omiyo ka ochulo kuor, to oonge gi miwafu ngang’!

³⁵Ok onyal yie mondo ochule gimoro, kendo kata mana chiwo malich manade ok nyal kueyo mirimbe!