Read luo Eklesiastes 1 Bible Online

Eklesiastes 1 - luo bible

Eklesiastes 1

¹Magi e weche Jayalo ma wuod Daudi, kendo mane ruodh Jerusalem.

²Owacho niya, “Ngima en gima nono. Gik moko duto onge tich. Gin gik manono giduto, kendo onge gima nigi tiende kata achiel!

³Ere ohala ma dhano yudo kuom gik moko duto motimo e piny ka?

⁴Tieng’ achiel kadho, kendo tieng’ machielo biro. Piny to osiko mana kaka en.

⁵Chieng’ wuok kendo podho, eka odok kuma owuokie mondo ochak owuog kendo.

⁶Yamo bende kudho kochomo yo milambo, kendo okudho kochomo yo nyandwat. Olworore alwora nyaka odog kuma nochakoree.

⁷Aore duto mol nyaka nam, to nam ok pong’. Bang’e pi dok adoka kuma aore chakoree, kendo chako mol.

⁸Gik moko duto miyo dhano bedo mool. Adier, ool motamore gi nono. Kata obedo ni wengewa neno gik mang’eny, to pod gidwaro mana neno gik moko. Itwa bende winjo weche mathoth, to pod dwaro mana winjo weche manyien.

⁹Gik ma osetimore biro timore kendo, bende gik mane dhano osetimo, obiro mana timo kendo. Onge gima nyien e piny ka.

¹⁰Adier, onge gimoro ma ng’ato nyalo wacho ni nyien. Ooyo, ok nyien! Nyaka bed ni nosebetie chon, ka pok onywolwa.

¹¹Tieng’wani ok par joma chon, mana kaka tieng’ mabiro luwo bang’wa ok noparwa.”

¹²An Jayalo, asebedo ruodh Israel ka adak Jerusalem.

¹³Ne aketo chunya kuom nono tiend gik moko duto matimore e piny mondo apuonjra tiendgi, mi ayudo ni tich ma Nyasaye osemiyo dhano mondo onyagrego e piny ka lit ahinya.

¹⁴Aseneno gik moko duto matimore e piny ka mi afwenyo ni gionge tich, mana ka yamo makadho.

¹⁵Gima obam ok inyal rieyo, bende ok inyal kwano gik maonge.

¹⁶ Ne awacho e chunya niya, “Asebedo ng’at mariekie moloyo ng’ato ang’ata mane okwongona bedo ruoth e Jerusalem, kendo ang’eyo ni rieko kod ng’eyo gin gik manade.”

¹⁷Ne aseketo chunya mondo apuonjra kendo ang’e pogruok manie kind ng’eyo gi fuwo, kendo manie kind rieko gi memruok. To asefwenyo ni mano bende en mana gima nono, ka yamo makadho.

¹⁸Rieko mang’eny kelo mana parruok mathoth. Adier, ka ing’eyo gik mang’eny, to imedo mana bedo gi chuny lit.