Read luo Eklesiastes 3 Bible Online

Eklesiastes 3 - luo bible

Eklesiastes 3

¹Gimoro amora ma timore e pinyni timore mana e kinde ma Nyasaye oseketone.

²Nitie kinde mar nywol, gi kinde mar tho, kinde mar pitho gi kinde mar putho,

³kinde mar nek, gi kinde mar chengo, kinde mar muko, gi kinde mar gero,

⁴kinde mar kuyo, gi kinde mar mor, kinde mar ywak, gi kinde mar miel,

⁵kinde mar keyo kite, gi kinde mar choko kite, kinde mar kwakruok, gi kinde ma ok kwakruokie,

⁶kinde mar dwaro gimoro, gi kinde ma gimoro lalie, kinde mar rito gimoro, gi kinde mar wito gimoro,

⁷kinde mar yiecho gimoro, gi kinde mar bepo, kinde mar ling’, gi kinde mar wuoyo,

⁸kinde mar hera, gi kinde mar sin, kod kinde mar lweny gi kinde mar kue.

⁹Ka kamano, to ere ohala ma dhano yudo kuom tichne duto?

¹⁰Koro ang’eyo tich ma Nyasaye osechanonwa.

¹¹Oseketo kinde mowinjore ni gimoro amora. Osemiyowa gombo mar ng’eyo gik mabiro timore, to ok osemiyowa fwenyo gik moko duto motimo.

¹²Kuom mano ang’eyo ni gima dhano nyalo timo en mana bedo mamor, kendo chamo piny ka pod ongima.

¹³Wan waduto onego wachiem kendo wamethi kendo wabed mamor, ka wachamo mwandu ma waseyudo. Mano en gima Nyasaye ema chiwo.

¹⁴Ang’eyo ni gimoro amora ma Nyasaye otimo siko nyaka chieng’. Ok inyal medoe gimoro, bende ok inyal goloe gimoro. Osetimo kamano mondo dhano oluore.

¹⁵Gimoro amora matimore nosetimore chon, kendo gimoro amora mabiro timore bende nosetimore. Nyasaye miyo gik moko duto nwoyore anwoya.

¹⁶Bende aseneno ni e pinyni, kama adiera gi bura onego bedie, to richo ema betie.

¹⁷Ne awacho e chunya niya, “Nyasaye biro yalo joma kare gi joma richo machalre, nikech kata mana e piny mabiro, gik moko duto te notimre mana e kinde moketnigi.”

¹⁸Ne aneno ni Nyasaye temo ji mondo onyisigo ni ok giber moloyo le.

¹⁹Chutho, gimoro achiel ochomo dhano gi le machalre. Dhano tho mana kaka le bende tho. Adier, giyueyo mana machalre.

²⁰Giduto ne gia kuom lowo, kendo kanyo ema ginidogie giduto. Kamano giduto gidhi kama chalre.

²¹Ere kaka ng’ato nyalo ng’eyo ni chuny dhano dhi e polo, to chuny le dhi e lowo?

²²Kuom mano, ne afwenyo ni kara gima dhano nyalo timo en mana chamo mwandu moseyudo, nikech mano ema Nyasaye osemiye, nimar ok onyal ng’eyo gima biro timore ka osetho.