Read luo Eklesiastes 4 Bible Online

Eklesiastes 4 - luo bible

Eklesiastes 4

¹Bang’e ne achako arango timbe ma isandogo ji e pinyni, mi ne aneno joma isando kaywak, to onge ng’ama konygi, nikech joma ne sandogi ne nigi teko mathoth.

²Kuom mano akwano joma osetho ka joma johawi moloyo joma pod ngima.

³To joma johawi moloyo joma osetho gi joma pod ngima gin jogo ma pok onywol, kendo ma pok oneno timbe maricho matimore e pinyni.

⁴Bende kane aparo gima omiyo ji tiyo matek mondo odhi maber, to ne ayudo ni gitimo kamano nikech gidwaro ni mondo gibed gi gik mang’eny moloyo jowadgi. To mano en gima nono, ka yamo makadho!

⁵Ji wacho ni ng’at mofuwo kende ema nyalo kwakore, to weyo kech nego.

⁶Mano nyalo bedo adier, to bedo gi chiemo moromo teng lwedo gi chuny mokue ber moloyo bedo gi chiemo moromo lwedo ariyo, to gi tich mang’eny maturi kayiem nono.

⁷Aseneno gimoro machielo e pinyni ma bende onge tich.

⁸En ngima ng’at modak kende maonge gi wuowi kata gi owadgi. Pile otiyo atiya matek, to mwandu moyudo ok rome. Openjore niya, “En ng’a ma atiyone matek, ka atuonora gik mabeyo ma onego acham?” Mano bende en gima nono, ma ok owinjore kata matin.

⁹Bedo ji ariyo ber moloyo bedo ng’at achiel, nikech ginyalo yudo pok maduong’ kuom tich ma gitiyo.

¹⁰Ka achiel kuomgi opodho, to machielo nyalo chungo wadgi. To ka ng’ato ni kende, mi opodho, to mano rach moloyo, nikech onge ng’at makonye.

¹¹Ka piny ng’ich, to ji ariyo nyalo nindo kaachiel mi bed maliet. To ere kaka inyalo bet maliet ka in kendi?

¹²Ka ng’atoo ni kende, to ng’ato nyalo monje mi hewe. Ji ariyo to nyalo hewo ng’atno. Adier, tol mokadi didek, chodo tek.

¹³Ng’ato nyalo wuok e dhier kata e tuech, mi bed ruodh pinygi. To kapo ni obedo mofuwo koseti, ma ok owinj rieko ming’adone, to ok oloyo wuowi ma jachan, man gi rieko.

¹⁵Aseng’iyo ji duto modak e pinyni, mi aneno ni nyaka bedie wuowi moro kuomgi ma nokaw kar ruoth.

¹⁶Ruoth nyalo bedo gi ji mang’eny ahinya e bwoye, to ka osetho, to onge ng’ama pako nyinge kuom gik ma osetimo. Mano bende en gima nono, mana ka yamo makadho.