Read luo Eklesiastes 5 Bible Online

Eklesiastes 5 - luo bible

Eklesiastes 5

¹Bed motang’ ka idhi e od Nyasaye, nimar dhiyo kuno mondo ipuonjri, ber moloyo chiwo misango ka ng’at mofuwo ma ok ong’eyo gima ber gi gima rach.

²Par maber ka pok iwuoyo, kendo kik irikni ka isingori ni Nyasaye. Nyasaye nie polo, to in inie piny, omiyo kik iwuo mathoth moloyo kaka owinjore.

³Ka in gi parruok mathoth, to ibiro bedo gi lek maricho. Kamano bende ka wecheni ng’eny, to inyalo wacho gima ofuwo.

⁴ Kuom mano, ka isingori ni ibiro chiwo ni Nyasaye gimoro, to tim kamano piyo, nikech Nyasaye ok mor gi ng’at mofuwo. Adier, tim gima isingori ni ibiro timo.

⁵Ber ka ok isingori moloyo singori, to ok itimo.

⁶Kik iwe wecheni iwuon teri e richo, nono to idhi e nyim jadolo mar Nyasaye, kiywagori ni iseketho, nikech kitimo kamano to imiyo Nyasaye kecho kodi, kendo obiro ketho gik ma luchi osemiyi.

⁷Kata ka lek medore, kendo weche manono bedo mathoth, to pod onego iluor aluora Nyasaye.

⁸Ka ineno ka piny moro sando joge modhier, ka timonigi marach, kendo tuonogi gik monego giyudi, to kik ibuogi, nimar jatelo ka jatelo nigi ng’at moloye gi duong’, kendo giduto bende gin gi joma dongonigi.

⁹Piny ma ruodhe ohero tich lowo ema dhi nyime maber.

¹⁰Ka ihero pesa, to pesa ok noromi ngang’, bende ka igombo bedo jamwandu, to mwandu miyudo ok noromi, nikech mano en mana gima nono.

¹¹Kaka mwanduni medore, e kaka joma ipidho bende medore. Ohala miyudo en mana ng’eyo ni in jamoko.

¹²Jachan pile nindo mamit, kata obedo ni ochamo gima tin kata mang’eny. Gik mang’eny ma jamoko nigo to miyo oparore, ma ok onyal nindo.

¹³Gima lich ma aseneno e pinyni en ni ji kano pesa mondo chieng’ moro okonygi,

¹⁴to achien giwito pesago te e gimoro maonge gi tich. Bang’e gidong’ nono maonge gima ginyalo weyoni nyithindgi.

¹⁵ Waweyo pinyni gi lwetwa nono, mana kaka ne wabiroe. Kata obedo ni wasetiyo matek, mwayudo mwandu, to onge gimoro amora mwaago.

¹⁶Mano gima lit ahinya. Wadhi mana kaka ne wabiro. Ere gima wayudo kuom tich manono mwachandorego?

¹⁷Wadak e mudho, ka chunywa lit kendo ka waluor, bende ka wakecho kendo ka watuo.

¹⁸Kuom mano, asefwenyo ni gima ber ma dhano nyalo timo en mana chiemo gi metho kod chamo mwandu moseyudo kuom kinde matin ma Nyasaye omiye mondo odaggo e piny ka. Mano e gima Nyasaye oseketo ni dhano.

¹⁹Ka Nyasaye oguedho ng’ato gi mwandu, kendo omiye dak maber, ma oweyone kinde mondo ocham gigo, to onego obed mamor ka ochamogi. Mano bende en gima Nyasaye ema ochiwo.

²⁰Kaka Nyasaye oseyiene mondo obed mamor kamano, ok obi thagore koparo ni ngima chwok.