Read luo Eklesiastes 7 Bible Online

Eklesiastes 7 - luo bible

Eklesiastes 7

¹ Nying maber ber moloyo mo mang’ue ng’ar ma nengone tek. Chieng’ tho ng’ato bende ber moloyo chieng’ nywolne.

²Ber dhi e dala ma iywagoe ng’at motho, moloyo dhiyo kama itimoe mor, nikech pile joma ngima nyaka par ni tho ema ochikowa waduto.

³Kuyo ber moloyo nyiero. Chutho, onyalo miyo wang’i bed mojuol, to kata kamano, omiyo riekoni bedo mabith.

⁴Ng’at maparo mana mor pile en ng’at mofuwo. Ng’at mariek to wiye ok wil gi tho.

⁵Ber mondo ng’at mariek okweri gimoro, moloyo yudo pak kuom joma ofuwo,

⁶nimar nyiero mar ng’at mofuwo onge tiende kata matin, to chalo mana gi kudho mararni e mach.

⁷Ka ng’at mariek owuondo ng’ato, to odoko mofuwo, bende ka ng’ato ochamo asoya, to okethore kende owuon.

⁸Giko mar gimoro ber moloyo chakruokne. Horuok bende ber moloyo sunga.

⁹ Kik iyi wang’ piyo, kendo kik ibed gi sadha e chunyi, nikech joma ofuwo ema timo kamano.

¹⁰Bende kik ipenjri gimomiyo chon gik moko ne dhi maber moloyo ndalogi, nikech mano en penjo mofuwo.

¹¹Rieko ber moloyo mwandu, kendo okonyo joma ngima duto man kode.

¹²Emomiyo ber bedo gi rieko moloyo bedo gi mwandu, nimar rieko kelo ngima ni jogo man kode.

¹³Parie gik ma Nyasaye osetimo. Ere kaka ng’ato nyalo rieyo gima Nyasaye osedolo?

¹⁴Ka gik moko dhini maber, to bed mamor. To ka chandruok ema omaki, to nyaka ipar ni Nyasaye kelo mor, bende okelo chandruok, omiyo ok inyal ng’eyo gima kiny notimre kiny.

¹⁵Ngimana osebedo ngima manono, to kata kamano aseneno gik moko duto! Aseneno ni ng’ato nyalo tho piyo, kata bed ni en ng’at makare, to bende ng’ato nyalo dak aming’a, to en ng’at marach.

¹⁶Kuom mano, kik ibed ng’at makare ahinya, kata ma ofuwo ahinya, nimar ere gima omiyo onego itur gi piny?

¹⁷To bende kik ibed ng’at ma timbene richo ahinya, kata ma ofuwo ahinya, nimar ere gima omiyo onego itho ka ndaloni podi?

¹⁸To bed mana e diere. Ka itimo kamano, kendo iluoroo Nyasaye, to inidhi nyime maber.

¹⁹Gima rieko timo ni ng’ato duong’ moloyo gima ruodhi apar nyalo timo ni dala ma gidakie.

²⁰Onge ng’ato kata achiel e piny ngima manyalo timo mana gik mabeyo lilo, ma ok oketho gimoro.

²¹Kik ichik iti ni gik moko duto ma ji wacho, nikech dipo ka iwinjo kata ka jatichni kuong’i.

²²Par ni in bende isekuong’o ji ndalo mathoth.

²³Ne apimo gigo duto gi rieko, ka aketo chunya mondo abed mariek. To ne ok anyal.

²⁴Ere kaka dhano difweny tiend ngima? Otut moyombowa, kendo otek modhierowa winjo.

²⁵To kata kamano, ne aketo chunya mondo apuonjra rieko. Ne adwaro yudo rieko mondo ang’ego tiend weche mane akia, kendo mondo afweny ni ng’at mofuwo en jaricho kendo janeko.

²⁶Ne ayudo ka dhako kech moloyo tho. Herane nyalo maki mana ka obadho kata ka tol, kendo bade ma okwakigo tueyi mana ka nyororo! Ng’at mohero Nyasaye to nyalo tony mak omako. Jaricho to ok nyal yombe.

²⁷An Jayalo awacho niya: Adier, ne afwenyo wechegi achiel kachiel kane oyudo adwaro mondo ang’e tiend gik moko,

²⁸to mana ka asedwero kuom ndalo mang’eny. To aseyudo ni ng’at achiel kende ema nyalo bet mariek kuom ji gana. Dhako to onge mariek kata achiel.

²⁹To gima aseyudo bende, en mana ni, Nyasaye ne ochueyowa joma kare, to wan wawegi ema wasegajore gi paro mathoth.