Read luo Eklesiastes 8 Bible Online

Eklesiastes 8 - luo bible

Eklesiastes 8

¹Ng’at mariek ema ong’eyo tiend gik moko. Rieko miyo wang’e rieny, kendo tieko ich wang’ ma en go.

²Nyaka itim gima jatelo owacho, kendo kik irikni kisingore ni ibiro chiwo ni Nyasaye gimoro.

³Ruodh piny nyalo timo gimoro amora mohero, omiyo kik ibed kama entie, nikech masira dipo ka oyudi kanyo,

⁴nimar ruoth nigi teko, kendo onge ng’ama hedhore kwero gima otimo.

⁵E kinde duto ma irito chikene, to onge gima notimi, kendo ng’at mariek ong’eyo kaka onego otim gimoro, kod kinde ma owinjore otimee,

⁶nimar nitie yo maber kod kinde maber monego timie gimoro amora, to gima chandowa en mana ni wan ok wang’eyo.

⁷Onge ng’ato kata achiel mong’eyo gima biro timore, to bende ere ng’ama dinyiswa?

⁸Onge ng’ama nyalo geng’o tho mondo kik nege, kata ng’ama nyalo chwalo chieng’ thone nyime. Ka lweny owuok, to onge tony! Onge gima wanyalo timo mi wakwo.

⁹Kane aparo gik moko matimore e piny ka, to ne aneno gigo duto, mi afwenyo ni ji moko nigi teko, kendo ji moko odak kathagore e bwogi.

¹⁰Bende ne aneno ka joricho biro, kendo donjo adonja Kama Ler. To kata kamano ne giwuotho awuotha e dala koni gi koni, ka gisungore ni gima gisetimono ok rach. To mano bende en tim manono.

¹¹Ji ketho aketha ma ok odewo, mana nikech gineno ni kata ka ng’ato oketho, to ok yud kum piyo kaka owinjore.

¹²Jaricho nyalo timo richo ndalo mathoth, to eka pod odak adaka aming’a. Adier, ang’eyo ni ji wacho niya, “Ka iluoro Nyasaye to gik moko duto dhini maber,

¹³to joma timbegi mono ok dhi nyime maber. Ngimagi chalo mana gi tipo makadho, kendo ginitho kapod gitindo, nikech ok giluoro Nyasaye.”

¹⁴To mano nono, nikech kinono gik matimore e piny, to ibiro yudo ni sa moro joma kare yudo kum ma joricho ema onego oyudi, to joricho yudo pok ma joma kare ema onego yudi. Mano emomiyo awacho ni gik moko duto onge tich.

¹⁵Kuom mano, aneno ni ng’ato nyaka cham raha, nikech onge mor ma dhano nigo mak mana chiemo gi metho kod chamo mwandune. Mano e pok moyudo kuom tich matek motiyo e kinde ma Nyasaye omiyego ngima e piny ka.

¹⁶Kane aketo chunya mondo ayud rieko, kendo ang’e tiend gik matimore e piny, to ne afwenyo ni kata ka ng’ato osiko ka neno otieno gi odiechieng’ ma ok nindi,

¹⁷to ok onyal ng’eyo gik ma Nyasaye timo. Kata da bed ni oketo chunye matek machal nade, to ok onyal ng’eyo tiendgi. Ji mariek paro ni ong’eyo tiendgi, to chutho ok ging’eyo.