Read luo Eklesiastes 9 Bible Online

Eklesiastes 9 - luo bible

Eklesiastes 9

¹Ne aketo chunya kuom kinde mang’eny, ka aparo, mi afwenyo ni joma riek kod joma kare, ni e lwet Nyasaye, kaachiel gi timbegi koda ka hera gi sigu ma gin go. Onge ng’ama ong’eyo kata mana gimoro achiel ma biro timorene.

²To mano onge wach, nikech gimoro achiel ema timore ni ng’at makare kod ng’at ma jaricho, bende ema timore ni ng’at maler, kod ng’at ma ok ler, kendo ni joma lamo Nyasaye gi joma ok lame. Onge pogruok manie kind ng’at malong’o gi ng’at ma jaricho, kata manie kind ng’at makuong’ore ni biro chiwo gimoro ni Nyasaye, kod ng’at ma oluoro kuong’ruok kamano.

³Adier, gimoro achiel ema timore ni ji duto machalre, kendo mano rach moloyo gik moko duto maricho matimore e piny ka. E kinde duto ma ji ngima, to chunygi opong’ gi richo kod gik manono, to bang’e githo mana apoya.

⁴To kata kamano, ng’ato ang’ata mapod ngima e pinyni nigi gima ogeno, nimar ber bedo guok mangima, moloyo bedo sibuor motho!

⁵Chutho, joma ngima ong’eyo ni gibiro tho. Joma otho to ok ong’eyo gimoro kata matin! Onge pok ma gibiro chako yudo, kendo wich owil kodgi chuth.

⁶Hera kod sigu kaachiel gi gombo mane gin go nosetho kodgi. Ok ginichak gine gimoro amora matimore e piny kaa.

⁷Emomiyo cham achama chiembi mondo ibed mamor, kendo madh amadha kongi mondo iwinj maber, nikech Nyasaye oseyie gi gik moko mitimo.

⁸Pile onego irwakri maber, kendo ibed mamor.

⁹Cham ngima gi chiegi e ndalo duto ma idak e ngima manono ma Nyasaye omiyini, nimar mano kende e gima niyudi kuom chandruok michandorigo e piny ka.

¹⁰Tim gik moko duto minyalo timo gi chunyi duto, nimar e piny joma otho, kuma ibiro dhiye, onge paro kata ng’eyo kata rieko, kata tim moro amora!

¹¹Gimoro machielo mane achako afwenyo en ni, e pinyni, jong’uech matek ok yomb e ng’uech pile, kendo joma thuondi ok lo lweny pile. Bende pile joma riek ok yud gima gikonyorego, kendo joma nigi paro pile ok bed jomwandu. Joma ong’eyo tich bende pile ok yud duong’ e tich. Kamano hawi marach mako ng’ato ang’ata.

¹²Ng’ato ok nyal ng’eyo sa ma kindene chopoe, nimar wachalo rech ma tol omako, kata winy ma omoko e wino. Adier, wamoko e sa marach ka ok wang’eyo kata matin.

¹³Nitie gimoro machielo maduong’ mane achako aneno, manyiso kaka ji okawo rieko e piny ka.

¹⁴Ne nitie dala moro matin ma ji odakie manok. Ruoth moro maratego ne omonje, mi olwore mondo omwom ohingane.

¹⁵To e dalano ne nitie ng’at moro modhier, to kata obedo ni nodhier kamano, ne oriek ahinya, ma dine oreso dalano, to onge ng’ama ne opare kata paro nono.

¹⁶Kane oneno kamano, ne owacho ni, rieko ber moloyo teko, to kata kamano onge ng’ama paro ni ng’at modhier bende nyalo bedo mariek, kata mayie winjo gik mowacho.

¹⁷To chutho, en gima ber chiko it ni weche mamuol ma ng’at mariek wacho, moloyo winjo weche ma ruoth kokgo e buch joma ofuwo.

¹⁸Rieko ber moloyo gik lweny, to jaricho achiel nyalo ketho gik mabeyo mang’eny.