Read luo Wer Mamit Moloyo Wende Moko Duto 1 Bible Online

Wer Mamit Moloyo Wende Moko Duto 1 - luo bible

Wer Mamit Moloyo Wende Moko Duto 1

¹ Ma e wend Solomon mamitie moloyo wendene mamoko duto.

²“Bi inyodha gi nyoth mogundho. Herani mit moloyo divai.

³Mo miwirorigo ng’we ng’ar. Kata mana nyingi kawinjo to dumna mamit ka mo mopukore, omiyo nyiri duto oheri.

⁴Kawa mondo waring wadhi mondo iketa e odi, yaye ruodha. Wabiro bedo mamor kaachiel, kendo wabiro madho hera mana ka divai. Adier, mano kaka heri en gima ber!

⁵Yaye, nyi Jerusalem, chieng’ oseloka rateng’ mana ka hembe Warabu, to kata kamano, pod aber abera mana kaka pasia mag od Solomon.

⁶Kik uchaya kuom bet dichol, nikech chieng’ ema oseloko kita kamano. Owetena ne mon koda, omiyo ne gimiya tich rito puoth mzabibu. Kuom mano, ne ok ayudo thuolo mar loso denda.

⁷In jaherana, nyisa kuma ibiro dhi kwayoe jambi. Gibiro yueyo kanye godiechieng’? Ere gima omiyo onego amanyi kuonde ma jokwath mamoko kwayoe?”

⁸“Donge ing’eyo kuma adhiyoe, yaye nyako ma jaber moloyo nyiri duto gi ber? Onego iluw tiend rombena, mondo eka ibi ikwa dieu but hembe jokwath.

⁹Jaherana, ilombo chwo ka faras madhako malombo farese machwo ma ywayo geche Farao.

¹⁰Yie wiyi mokadi nenore maber koliero e lembi kendo e ng’uti mana ka tigo ma nengone tek.

¹¹To wabiro losoni thiwni mag dhahabu kod tigo mag fedha.”

¹²“Kane ruodha pod obet e kome, mo mane awirorago ne dum mamit.

¹³Ka jaherana onindo e agoga to awinjo maber, mana kaka awinjo ka aliero mo mang’ue ng’ar e kind thundena.

¹⁴Jaherana chalo gi maua maber ma dongo e puothe mzabibu man Engedi.”

¹⁵“Mano kaka ijaber, yaye jaherana! Mano kaka ijaber! Wengeni nyiso mana hera lilo.”

¹⁶“In bende iber manadi, yaye jaherana! Mano kaka ilomba! Lum mayom ema biro bedo kitandawa,

¹⁷kendo bede yien mokar nobednwa tado.