Read luo Wer Mamit Moloyo Wende Moko Duto 3 Bible Online

Wer Mamit Moloyo Wende Moko Duto 3 - luo bible

Wer Mamit Moloyo Wende Moko Duto 3

¹Ne aleko jaherana otieno kotieno, ka anindo e kitandana. Ne amanye, to ne ok anyal yude. Bende ne aluonge, to ne ok odwoka.

²Ne aa malo, mi awuotho e dala duto kadwaro jaherana. Adier, ne amanye, to ne ok anyal yude. Bende ne aluonge, to ne ok odwoka.

³Eka ne aromo gi jorit mag dala mi apenjogi niya, “Bende usenenonae jaherana?”

⁴Piyopiyo nono kane aseweyogi ne ayudo jaherana. Ne akwake matek, ma ok aweyone thuolo, nyaka ne atere e od mama, kama ne onywolae.

⁵“Un nyi Jerusalem, kuongrenauru gi nying le mae thim ni ok unuchoch herawa.”

⁶Mano ang’o mawuok e thi ka iro madhuolore, machalo ich ubani miwang’ono, kata machalo poda ma johala kelo?

⁷Neuru, giting’o kom miting’oe Solomon, kendo thuwondi piero auchiel olwore. Gin jolweny magerie moloyo e Israel.

⁸Giduto ging’eyo kedo gi ligangla, kendo gin jolweny molony. Moro ka moro omanore gi ligangla, koikore kedo gi gimoro manyalo monjogi gotieno.

⁹Ruoth Solomon noloso kom mane iting’egono gi yiend Lebanon mabeyo mokadho.

¹⁰Bethene ne olos gi fedha. Kama itenoe wich to ne olos gi dhahabu, kendo kama ibetie nolos gi law maralik. Iye to ne nyi Jerusalem oloso maber gi lak liech.

¹¹“Un nyi Sayun, biuru mondo une ruoth Solomon! Orwako osimbo mane min mare osidhone chieng’ mane okendoe monenoe mor maduong’.”