Read luo Wer Mamit Moloyo Wende Moko Duto 5 Bible Online

Wer Mamit Moloyo Wende Moko Duto 5 - luo bible

Wer Mamit Moloyo Wende Moko Duto 5

¹“Asebiro e puotha, yaye chiega ma jaherana. Achoko gik mang’ue ng’ar. Bende achamo mor kichna, kendo amadho divacha kod chaga.” “Ee, chiem, kendo meth ametha, nyaka chop hera meri.”

²Ne oyudo anindo to chunya wuotho. Eka ne awinjo ka jaherana dwong’o dhoot, kawacho niya, “Yawna, chiega ma jaherana, kendo winja majaber. Wiya otimo pi nikech tho omokoe. Adier, yie wiya ng’ich nikech ng’ich mar otieno.”

³Ne adwoke niya, “To sani aselonyora. Idwaro ni mondo achak arwakra koso? Bende aselwoko tienda. Koso idwaro ni mondo achak anyon piny?”

⁴Jaherana ne osoyo lwete gi e otuch manie dhoot, mi awinjo ka denda duto tetni.

⁵Kane achung’ mondo ayawne, to lweta ne ton mo mang’ue ng’ar. Chutho, mo mane nie lith lweta ne oton e ralor mar dhoot.

⁶To kane ayawo ni jaherana dhoot, to ne ayudo ka osea! Mano kaka ne agombo winjo dwonde! Ne arange koni gi koni, to ne ok anyal nene. Bende ne aluonge, to ne ok odwoka.

⁷Jorit mag dala ne joromo koda. Ne gigoya, mi gihinya marach, to bende jorit man ewi ohinga ne oyudho kabuda mokawo.

⁸A yaye, un nyi Jerusalem, ka uneno jaherana, to yie unyise ni hera ma aherego dwaro nega!

⁹“In nyako ma jaber moloyo nyiri duto gi ber, nyiswae kaka jaheranino chalo. Ang’o ma oloyogo yawuowi moko duto, momiyo ichikowa matek kamano?”

¹⁰“Jaherana jaber kendo ratego. En ema onenore kata kuom ji gana apar.

¹¹Yie wiye oyuwo kendo boyo bende rateng’ kendo ng’ich thi. Adier, yie wiye ber moloyo dhahabu.

¹²Wang’e chal gi akuch rachar manie bath aora, kata ma dumbore e chak.

¹³Lembe ber mana ka puodho ma ogawore gi alode mamit kod gik mang’ue ng’ar. Dhoge chalo gi ondanyo, kendo ton mo mang’ue mamit.

¹⁴Lwetene beyo, kendo orwakoe tere mochomie kite ma nengogi tek. Nungone chalo gi lak liech mapoth, mobaw gi kite mabeyo mamil.

¹⁵Ogwendene chalo gi sirni molos gi kite mag ombo, mochom e rachungi mag dhahabu maler. Ka inene, to omiyo igamo yueyo, mana ka ng’ama oneno got Lebanon motimo yiend sida mabeyo.

¹⁶Mano kaka dhoge ber nyodho, kendo gimoro amora man kuome berna! Koro un nyi Jerusalem, mano e kaka jaherana chalo.”