Read luo Wer Mamit Moloyo Wende Moko Duto 7 Bible Online

Wer Mamit Moloyo Wende Moko Duto 7 - luo bible

Wer Mamit Moloyo Wende Moko Duto 7

¹Yaye nyar jaduong’, mano kaka tiendi beyo, kirwako patpat. Embeni becho mana ka gima japecho molony ema opayo.

²Pendi chalo gi bakul ma divai mamit ok rumie. Nungoni bende chalo gi pidh cham ma maua mabeyo olworo, moketo diere.

³Thundi chalo mana gi nyidiek marude.

⁴Ng’uti to chalo gi osuch lak liech, kendo wengeni nyiwni ka pi yewni man but dhoranga Heshbon, dala maduong’. Umi ber mana ka got Lebanon moting’ore kochomo Damaski.

⁵Wiyi ni malo mana ka got Karmel, kendo yie wiyi mokadi ber mana ka law maralik, ma kata mana ruoth koneno, to chunye chandore!

⁶Mano kaka iber, yaye jaherana, kendo mano kaka mor mimiya lichna!

⁷Iber mana ka yadh nas, kendo thundi kwar mana ka olemo.

⁸Emomiyo abiro idho yadhno mondo apon olembene! Thundeni chalona saga mar olemo, kendo muchi dumna mamit mana ka maua.

⁹Dhogi bende mit ka divai, mamol mos e kind lekena ka amadho.”

¹⁰An mar jaherana, kendo odwara.

¹¹“Bi yaye jaherana wadhi waba oko, mondo wanind e puothe mag mzabibu gotieno.

¹²Wabiro chiew gokinyi mondo warang yiend mzabibu, kendo wane ane ka gisechako loth, kata ka gisechako thiewo. Bende mondo wane ane ka yien moko osemoyo. Eka anachiwrani kuno.

¹³Kuno to inyalo ng’ueyoe tik kungumanga, kendo olembe mamit duto odhuro kuno. A yaye jaherana, asekanoni kit mor duto te!