Read luo Isaya 1 Bible Online

Isaya 1 - luo bible

Isaya 1

¹ Ma e fweny ma wuoyo kuom Juda gi Jerusalem, mane Isaya wuod Amoz oneno e kinde mag loch Uzia gi Jotham, kod Hezekia, mane ruodhi Juda:

²Winjuru un polo gi piny, kendo chikuru itu, nikech Ruoth Nyasaye osewuoyo, ka wacho niya, “An gi nyithindo ma asepidho modoko madongo, to koro gisepiem koda.

³Dhiang’ ong’eyo wuon-go, kendo kanyna bende ong’eyo kund wuon Jo-Israel to ok ong’eya. Adier, joga awuon onge gi paro!

⁴A yaye oganda ma joricho ma opong’ gi timbe mamono, kendo ma joge joketho ma acheje! Useweyo Ruoth Nyasaye, Ng’ama Ler mar Israel kuchaye kendo ulokone ng’eu.

⁵Ka pod usiko upiem apiema koda kamano, to ere dendu kama pod anyalo goyo, ka adhonde opong’o wiu, kendo ringreu duto odholore kama?

⁶Onge kama ngima e dendu, chakre tiendu nyaka wiu, mak mana kuonde moridhore gi kuonde moriemo kod adhonde, ma pok oketie yath, kata motue, kata mowirie mo ma dimi gichangi.

⁷Pinyu odong’ gunda, kendo miechu mach osewang’o, bende jopinje moko nono mayou chambu mana e wang’u kuneno. Adier, odong’ gunda, mana kaka Sodom nodong’, kosekethi.

⁸Sayun kende ema odong’, ka kiru mar jorito modong’ e puodho bang’ keyo. En dala ma wasigu olworo koni gi koni.

⁹ Ka dine Ruoth Nyasaye Manyalo Gik Moko Duto ok oreso ji manok kuomwa to dine otiekwa chuth, mana kaka ne otiek Sodom gi Gomora.”

¹⁰Un ruodhi mag Jerusalem, kaachiel gi jou, winjuru wach Ruoth Nyasaye. Ee, un muchalo gi jo-Sodom gi jo-Gomora, chikuru itu ni puonjne.

¹¹ Openjou niya, “Ere ohala mar timona misengni mogundho? Aol gi misengni mag imbe miwang’o pep, kaachiel gi boche mag jamni machwe. Bende ok agomb remb ruedhi gi mag rombe kod mag nyuogi.

¹²Ere ng’ama osekwayou mondo uchiw gigo ka ubiro e nyima? Ok unuchak unyon laru mar Hekaluna kendo!

¹³Gik muchiwona onge tich, kendoo tikgi dwaro ng’oga! Bende sewni mutimo ka due opor, kendo mutimo e kinde mag Sabato, ojoga. Chokruok mutimo, gi ndalou mag tueyo chiemo kod sewni mamoko bende ok adwar.

¹⁴Ok ayie kodgi! Giwang’o iya, kendo ok adwar nenogi chuth!

¹⁵Bende ka uting’o bedeu malo ka ulemo, to abiro umo wang’a mondo kik aneu, kendo kata da bed ni ulemo machal nade, to ok nawinju

¹⁶nikech lwetu otimo remo. Lwokreuru mondo ubed maler, bende goluru timbeu mamono oko e wang’a,

¹⁷kendo uwe timo richo to utim mana gik mabeyo. Luwuru mana adiera, kendo konyuru joma ithiro. Bende nyaka une ni nyithi kiye kod mond liete oyal buchegi kare.”

¹⁸Ruoth Nyasaye wacho niya, “Koro biuru, wapor wach kaachiel. Kata obedo ni richou kwar manade, to ginidog matar ka pe. Adier, kata ka gikwar ka remo, to ginibed marachar ka pamba.

¹⁹Ka uyie kuoma, mumako chikna gi chunyu duto, to unucham gik mabeyo duto manie piny.

²⁰To ka udagi, mi upiem koda, to ligangla notieku. An Ruoth Nyasaye ema awacho kamano.”

²¹Mano kaka dala Jerusalem mane chon oluoro Nyasaye koro chalo mana gi dhako moweyo chwore, to dwanyore gi chwo mamoko! E kinde moko ne en kama adiera nitie, to tinde jonek ema opong’e.

²²Fethu oselokore chuoth nyinyo, kendo divachu otimo pi.

²³Jotendu duto gin jopiem, kendo giwinjore gi jokuoye. Giduto gihero chamo asoya, kendo gidwaro mondo ji omigi amiya gik moko. Kuom mano ok giyal buche nyithi kiye kare, bende weche ma mond liete okelo e nyimgi ok gidew.

²⁴Omiyo Ruoth Nyasaye ma Nyakalaga, ma en Ng’ama Nyalo Gik Moko Duto mar Israel, wacho niya,

²⁵“Anachak asandu mi apuodh richou duto mana ka ng’ama lenyo fedha mondo chuoth nyinyo owuogi.

²⁶Bang’e anamiu jong’ad bura mabeyo, kod jobura mariek mana kaka chon. Bang’ mano dalau nochak oluongi ni, ‘Dala ma adiera nitie’, kendo ni, ‘Dala moluoro Nyasaye.’

²⁷Ka jo-Sayun olokore moweyo richogi, kendo oluwo yo makare, to anawargi.

²⁸Joricho duto gi joma piem koda to norum chuth, nimar gidagi biro ira.

²⁹Tinde umor kulemo e tiend yien madongo, kendo kutimo misengni e puothe mowal ni tijno, to achien wiu nokuodi.

³⁰Uchalo gi yath ma pote oner, kata ka puodho ma koth ok chuee!

³¹Ng’at ma rategoe moloyo nochal oswekle, kendo timbeu mamono ema nodok pilni mach, mi un uwang’ kaachiel gi timbeu, ma onge ng’ama nego majno!”