Read luo Isaya 10 Bible Online

Isaya 10 - luo bible

Isaya 10

¹Yaye, unune malit, un joma loso chike ma ok ni kare, kendo ma keto chike maricho mathiro ji.

²Utamo joma odhier e adier, kendo umayo joga ma jochan gik monego giyudi, bende uyako mond liete kod nyithi kiye.

³To unutim ang’o chieng’ mikumou, ka masira moa kuma bor omakou? Ere ng’ama nuring ire mondo okonyu? Koso ere kama un uweye nyithindu

⁴mondo kik gikirni e nyim jotuech, kata kik gipodhi e lwet janek? To kata kamano mirimb Ruoth Nyasaye ok norum, kendo pod nosik kokumou akuma.

⁵ Ruodh Asuria e luth ma agoyogo ji ka akecho. Ee, en e luth ma akumogo ji ka mirima omaka.

⁶En ema aore mondo odhi oked gi oganda moweyo Nyasaye Adier, achike mondo omonj joma miya mirimago. Mi oketh mwandu, kendo oyakgi kaka en ema odwaro, konyonogi piny, mana ka chuodho minyono e wang’ yore.

⁷To ruodh Asuriani ok ong’eyo ni an ema ne aore. Oparo mana in en omonjo amonja ji, kodwaro ni mondo olo piny duto.

⁸Owacho niya, “Donge jotenda duto gin ruodhi?

⁹Aseketho Kalno mana kaka naketho Karkermish, kendo asetimo ni Hanath mana kaka natimo ni Arpad, bende aseketho Samaria mana kaka naketho Damaski.

¹⁰Kaka koro asekawo pinje ma lamo nyiseche manono ma kido ma gin go ng’eny maloyo mag Jerusalem gi Samaria

¹¹donge abiro timo ni Jerusalem kod nyisechene manono, mana kaka asetimo ni Samaria kod kido mage manono?”

¹²Ka Ruoth Nyasaye osetieko kumo jo-Jerusalem kaka nochano to enokum ruodh Asuria kuom timbene mag sunga kod ng’ayi,

¹³nimar ruodh Asuria osewacho niya, “Aseloyo lwenjegi duto mana gi tekona kod riekona awuon, nikech an gi ng’eyo. Ne aketho tong’ mag pinje, mi ayako mwandugi mathoth, kendo anyono ji e buru.

¹⁴Lweta oseyudo kuonde ma mwandugi nitie, kendo asekawo pinje duto mana kaka ng’ato kawo tong’ e od winyo ma oringo, ma onge gima kwadho buombe, kata ma ng’amo dhoge, kata ma chwicho!”

¹⁵To Ruoth Nyasaye nowacho niya, “Bende le disungre ni ng’at matong’o kode? Koso musemeno dibed maduong’ moloyo ng’ama ng’eto kode? Mano nyalo timore mana ka luth nyalo yiengo ng’ama oting’e, kata ka arungu bende nyalo ting’o dhano ma sirore kode!”

¹⁶Kuom mano, Ruoth Nyasaye Manyalo Gik Moko Duto biro kelo tuo kuom jolwej Asuria marateke, chakre e wigi nyaka lith tiendgi, kendo tuo noliel ka mach ei ringregi.

¹⁷Ler mar Israel nolokre mach. Adier, Ng’ama Ler nolokre mach mang’ang’ni, ma chieng’ moro nomuochi, mi wang’gi pep odiechieng’ achiel mana ka kudho.

¹⁸Notiekgi chuth, mana ka bunge kod puothe mag olembe mabeyo mowang’ chuth, kata ka ng’at ma tuo ochamo dende motieko,

¹⁹kendo ginidong’ manok, mana ka yien manok modong’ e bungu ma kata mana nyathi matin nyalo kwano achiel ka achiel.

²⁰Chieng’no jo-Israel ma nyikwa Jakobo manok modong’ nowe keto genogi kuom ng’at mane dwaro tiekogi, to ginigen gi chunygi duto mana kuom Ruoth Nyasaye ma en Ng’ama Ler mar Israel.

²¹Adier, joma nok modong’ ma nyikwa Jakobo noduog ir Nyasaye Maratego.

²² Un jo-Israel, kata obedo ni ung’eny ka kuoyo mae dhonam, to ji manok modong’ kuomu kende ema nochak oduogi, nimar Nyasaye oseketo bura makare mabiro tieko joge duto.

²³Adier, Ruoth Nyasaye Manyalo Gik Moko Duto osechano kelo masira ma biro tieko piny duto.

²⁴Mano emomiyo owacho kama: “Un joga modak Sayun, kik uluor jo-Asuria, kata obedo ni gisandou kaka ne jo-Misri otimonu chon,

²⁵nimar piyopiyo nono mirima ma koro omaka kodu biro rumo, to gin ema abiro kecho kodgi mia tiekgi.

²⁶Abiro chwadogi gi del, mana kaka ne achwado jo-Midian kane atiekogi e lwanda Oreb, kendo kaka ne achwado jo-Misri e Nam Makwar.

²⁷Chieng’no ting’ mapek mane jo-Asuria oketo e goku nogol, kendo nyororo ma osebedo ka gitueyogo ng’utu nochod oko.”

²⁸Ne aneno e fweny ni: Mony moa Rimon osechopo Ayath gisekadho Migron, kendo kikano gigi Mikmash

²⁹gisebiro gi yo maluwo Maabara, mi gibworo Geba. Jo-Rama kibaji goyo, kendo jo-Geba, dala Saulo, kihondko omako.

³⁰Un jo-Bath-galim, gouru uwi! To un jo-Laish, chikuru itu. Un jo-Anathoth, dwokgiuru.

³¹Jo-Madmena ringo. Un jo-Gebim bende ringuru utony!

³²Kawuono ruodh Asuria biro guro kambine Nob. Okwadho bandera ma nyiso ni omonj Sayun, god Jerusalem.

³³To neuru kaka Ruoth Nyasaye Manyalo Gik Moko Duto nego wasike mana kaka mil polo lwero yien. Onego jotelo gi joma moko duto mana ka ng’at ma tong’o yien, mi yien maboyo podhi kendo kata mana mago madongoe moloyo kulre piny.

³⁴Ee, Nyasaye Maratego biro goyo jo-Asuria piny mana ka ng’at ma tong’o yiend Lebanono.