Read luo Isaya 13 Bible Online

Isaya 13 - luo bible

Isaya 13

¹ Ma e wach mane Nyasaye onyiso Isaya wuod Amoz kuom Babulon e fweny:

²Chunguru bandera ewi got mojuer kaka ranyisi muluongogo wasik Babulon. Gwelgiuru mondo gidonj e dhoranga Babulon.

³An awuon ema agolo chik ni jolwenja. Adier, asechiko joga marateke ka akecho, mondo otim gima adwaro. Gigombo mondo an ema alo lweny.

⁴Winjuru kaka koko mar oganda mang’ongo gore ewi gode! En koko mar ogendini ma chokore kaa e pinje mopogore opogore. Ruoth Nyasaye Manyalo Gik Moko Duto choko oganda mang’ongo mar lwenyno.

⁵Gia e piny mabor, manie tung’ piny mogik. Ruoth Nyasaye ema kelo jogo kaka gige mag lweny mondo okethgo piny gi mirimbe mager.

⁶ Gouru uwi, un jo-Babulon, nimar chieng’ ma Ruoth Nyasaye Manyalo Gik Moko Duto oseketonu koro ochopo machiegni! En odiechieng’ ma abiro keloe masira maduong’ e piny.

⁷Chieng’onogo lwet ng’ato ka ng’ato nowengni, kendo kibaji nogo ji duto, ma chunygi a chuth.

⁸Rem bende noneggi mana ka dhako ma muoch kayo. Ng’ato ka ng’ato nong’i wadgi ka kihondko omako, kendo ka neno awedho.

⁹Adier, chieng’ ma Ruoth Nyasaye oseketo biro. En odiechieng’ mirima gi ichwang’ mager, ma obiro kethoe piny, mi lokre thim, kendo otiekie joricho duto.

¹⁰ Sulue mag polo ok norieny, kendo wang’chieng’ nolokre mudho ka wuok. Due bende ok norieny.

¹¹Abiro kelo masira e piny, kendo abiro kumo joma timbegi mono kaka owinjore, mondo ng’ayi mag josunga orum, kendo athir nyadhi mag joma wang’gi tek.

¹²Abiro miyo ji doko manok mana kaka dhahabu maberie moloyo migolo Ofir nok.

¹³Chieng’no Ruoth Nyasaye nokech malich mi polo notetni, kendo piny noyiengni mi leng’re.

¹⁴Bang’ mano, ng’ato ka ng’atoo nodog thurgi ir joodgi, mana ka le ma jodwar lawo, kata ka rombe moke ma onge ng’ama chiko.

¹⁵Ji duto moyudi nochwow, mi tho. Adier, ng’ato ka ng’ato momaki, ligangla ema nonegi.

¹⁶Nyithindgi bende nochwad piny e wang’gi ka gineno. Utegi noyaki, kendo mondgi bende nomak gi thwon.

¹⁷Abiro kelo jo-Media, ma ok dew fedha kata ok gomb dhahabu, mondo omonjgi.

¹⁸Jo-Media biro nego yawuotgi gi asere, gin joma ok kech kata mana nyithindo.

¹⁹ Kamano, kata obedo ni Babulon, en dala maberie moloyo mier mag pinje mamoko duto, kendo ma jo-Babulon sungorego, to Nyasaye nokethe mana kaka noketho Sodom gi Gomora.

²⁰Ng’ato ok nochak odag kuno kuom tienge duto mabiro onge ja-Arabu ma nogur hembe kanyo, bende onge jakwath ma nokwa jambgi kuno.

²¹ Kanyo ema ondiegi mae thim nonindie, kendo gik maricho mag bungu nopong’ udi man kuno. Tula mag thim bende nodagie, kendo jochiende notugie.

²²Otoche noywagre e udigo. Bwe bende nodagi e udi madongo mabeyo. Yaye! Ndalo Babulon sudo machiegni. Adier, kinde matin ema odongne!