Read luo Isaya 16 Bible Online

Isaya 16 - luo bible

Isaya 16

¹Ruodhi mag Moab noor chiwo mag rombe Jerusalem, ka gin Sela e thim.

²Ka mond Moab ochopo e kuonde mong’adogo aora Arnon, to ginichal mana nyithi winy morwenyo, ma huyo koni gi koni.

³Giniwach niya, “Konywauru gi tekou duto, kendo tipou mondo ogeng’nwa chieng’ makech’ mondo ochalnwa ka gima en otieno. Panduru jowa ma oseriembi, kendo kik uyie mondo omak joma oringo lweny.

⁴Weuru mondo jo-Moab ma onge mier oyud kar konyruok kuomu, kendo pandgiuru mondo kik joyeko yudgi. Ka thak mithagogo ji oserumo, kendo jokeyo osetieko tijgi, mi jogo duto mathiro ji oa e piny,

⁵To kom loch nogur kuom ng’wono mar Nyasaye, kendo jang’ad bura mar adier ma nyakwar Daudi ema nobed e komno. Enobed ng’at madwaro mana adiera, kendo ma timo gik makare mak odeko.

⁶Wasewinjo humb jo-Moab, kaka gin josunga. Adier, wasewinjo kaka ging’are malich, kendo kaka wechegi opong’ gi miriambo lilo.

⁷Kuom mano, jo-Moab biro ywak. Adier, gibiro ywak malit. Giniywag olemb mzabibu motwo mag Kir-hareseth ma osekethore chuth,

⁸kendo giniywag puothe mag Heshbon mowe, kod mzabibu mosener mag Sigma, ma yande divachgi mero jotend ogendini. Ne gigawore nyaka Jazer, mi gitundo e thim kod nam.

⁹Kuom mano, abiro ywago mzabibu mag Sigma mana kaka aywago Jezer. Un jo-Heshbon kod jo-Eleale, pi wang’a biro lwokou, nimar mahu mar lweny ema biro winjore e puotheu mag olembe monyak maber.

¹⁰Mor kod ilo norum chuth e puotheu mabeyo, kendo onge wer ma nower e puotheu mag olembe, bende onge ng’ama nogo koko gi mor. Ok unuchak ubi mzabibu kuonde bicho, kendo mahu mag mor mugoyo e ndalo keyo biro rumo.

¹¹Kuom mano, chunya ywago jo-Moab gi jo-Kirhereseth, mana ka ng’ama goyo thum e liel.

¹²Kata ka jo-Moab chandore kadhi e hembko manie wi gode, mondo otim misengni kendo kata ka gidonjo e hekalu margi mondo gilem, to onge gima giniyudi.

¹³Mago e weche mane Ruoth Nyasaye owacho kuom jo-Moab chon.

¹⁴To koro owacho niya, “Bang’ higni adek, ma ok okadho ngang’, duong’ mar Moab norum, kendo ji manok marichoricho ema notony kuom joge mang’enygo.”