Read luo Isaya 19 Bible Online

Isaya 19 - luo bible

Isaya 19

¹ Wach mane Nyasaye onyiso fweny kuom Misri e ma: Neuru kaka Ruoth Nyasaye biro piyopiyo e boche polo. Obiro e piny Misri, emomiyo nyiseche manono mag Misri kirni.

²Owacho niya, “Abiro thuwo jo-Misri e kindgi giwegi, mi ng’ato ka ng’ato gore gi wadgi. Dala ka dala noked gi dala machielo, kendo gweng’ ka gweng’ bende noked gi wadgi.

³Chuny jo-Misri nonyosre, kendo anaketh rieko ma ging’ado, mi ginipenj nyiseche manono mondo onyisgi wach, bende ginidhi ir ajuoke mopogore opogore.

⁴To anaket piny Misri e lwet jatelo mager. Adier, ruoth makwiny ema notigi. An Ruoth Nyasaye Manyalo Gik Moko Duto ema awacho kamano.”

⁵Aora Nael noduon, mi two

⁶kendo kuonde ma pi luwo nodum marach. Aore mamoko mag Misri nodwon mi two, kendo odundu gi se bende nowang’.

⁷Lege duto man but aora Nael, kod gik mopidhi e bathe, duto yamo nolalgo nono.

⁸Jolupo duto moywagi. Adier, jogo duto malupo gi olowo e aora Nael, kaachiel gi mago machiko tonde kuno, chunygi nonyosre.

⁹Joma chueyo nengni gi tworo kata gi pamba none marach, nikech gigo ok nochieg maber.

¹⁰Ee, jotueng’o mag Misri nodhier nono, kendo jotich duto nobed gi chuny malit.

¹¹Mano kaka ufuwo, un jotelo mag Zoan. Adier, unyalo bedo jong’ad rieko mag Farao mabeyo moloyo. Omiyo ere kaka unyalo wacho ni Farao niya, “Wan yawuot joma riek ma nyikwa ruodhi machon”?

¹²Koro in Farao, ere jogi mariek, mondo obi opuonji kendo omi ing’e gima Ruoth Nyasaye Manyalo Gik Moko Duto osechano timo e Misri?

¹³Jotend Zoan ofuwo adier, kendo jodong Nof paro e chunygi giwegi ni giriek, to ok giriek. Kamano jotend dhout Misri osewito jogi.

¹⁴Ruoth Nyasaye osemiyogi chuny mar fuwo. Emomiyo rieko duto ma ging’ado obam, kendo gimiyo jo-Misri kier e gik moko duto ma gitimo, mana kaka ng’at momer kier e ng’okne.

¹⁵Jo-Misri ok nodhi nyime maber e gimoro amora ma gitimo, bed ni jatelo ema time, kata ng’ama chal nade ema time.

¹⁶E ndalogo jo-Misri nobed manyap ka mon. Ginibed maluor, kendo ginikirni ka Ruoth Nyasaye Manyalo Gik Moko Duto orieyo lwete kuomgi mondo okumgi.

¹⁷Piny Juda nolokre masira ni jo-Misri. Nyinge kende ka jo-Misri owinjo, to nogogi gi kihondko, nikech gik ma Ruoth Nyasaye Manyalo Gik Moko Duto osechano timonigi.

¹⁸E ndalog, noyud ka joma odak e mier abich mag Misri wuoyo gi dho Hibrania, ka kuong’ore ni noluw Ruoth Nyasaye manyalo Gik Moko Duto. Dala achiel kuomgi noluong ni Dala Wang’chieng’.

¹⁹E kindego, nobedie kendo-mar-misango mar Ruoth Nyasaye e dier Misri, kod siro maler mochung’ ni Ruoth Nyasaye e tong’ piny Misri.

²⁰Sirono nochung’ kanyo kaka ranyisi, kendo kaka rapar ni Ruoth Nyasaye Manyalo Gik Moko Duto e Misri, mondo ka giywakne e kinde ma wasikgi thirogi, to oornigi jawar, mondo okonygi kendo oresgi.

²¹Ruoth Nyasaye noyangre ni jo-Misri mondo ong’eye, kendo chieng’no giniyie kuome, mi ginitimne misango mar cham kod misengni mamoko. Bende ginikuong’re, mi gichop kuong’ruokgigo.

²²Ruoth Nyasaye nogo jo-Misri, to kata kamano, enochanggi mana e kinde ma ogoyogieno. Pile ka giduogo ire, to enowinj kwayogi, mi ochanggi.

²³E kindego ndara maduong’ nobedie moa Misri kadhi Asuria. Jo-Asuria nobi Misri, kendo jo-Misri bende nodhi Asuria. Kamano jo-Misri gi jo-Asuria nolam Nyasaye kaachiel.

²⁴E ndalogo, duong’ mar Israel nobed maromre gi duong’ mar Misri kod mar Asuria, kendo pinje adekgo nobed gueth e dier piny.

²⁵Ruoth Nyasaye Manyalo Gik Moko duto noguedhgi, ka wacho kama: “Oguedh jo-Misri ma joga, kendo oguedh jo-Asuria ma chuechna, bende oguedh jo-Israel ma gin mwanduna awuon.”