Read luo Isaya 2 Bible Online

Isaya 2 - luo bible

Isaya 2

¹Ma e wach mane Isaya wuod Amoz oyudo e fweny, ma wuoyo kuom Juda gi Jerusalem:

²“E ndalo mabiro, got ma Hekalu ochung’ie nobed mabor moloyo gode moko duto, kendo ogendini duto nodhi kanyo,

³ka giwacho niya, ‘Wadhiuru god Ruoth Nyasaye. Enopuonjwa yorene kendo wanaluwgi.’ Puonj mar Ruoth Nyasaye wuok Jerusalem. Ee, Sayun e kama owuoyoe gi joge.

⁴ Enong’ad bura ka othego ogendini mopogore opogore kendo enoyal pinje mang’eny. Ng’ato ka ng’ato nothedh liganglane mondo obed kwer. Tongegi to ginithedh rabetni. Onge oganda moro ma noked gi oganda machielo, kendo ji ok nochak opuonjre lweny.”

⁵Biuru, yaye un joka Jakobo, mondo wawuoth e ler mar Ruoth Nyasaye.

⁶Ruoth Nyasaye osejwang’ou nikech uyie gi jo yo wuok chieng’ ma dhi ajuoga, kendo mawuoyo gi jochiende mana ka jo-Filistia. Bende jopinje mamoko yudore kamoro amora e pinyu.

⁷Pinyu opong’ gi fedha gi dhahabu kod mwandu mokadho akwana, kaachiel gi farese mang’eny gi geche mogundho mag lweny.

⁸To bende opong’ gi nyiseche manono ma lwetu uwegi ema oloso, ni to mago ema ulamo!

⁹Ji ma ogen gi ji ajia duto nodwok piny. Kuom mano, onego Nyasaye kik wenu!

¹⁰ Donjuru e buche manie lwendni kata manie lowo, ka uluoro duong’ malich mar Ruoth Nyasaye kod tekone,

¹¹nimar ndalo biro ma sunga ma dhano sungorego nodwok piny, to Ruoth Nyasaye kende ema noting’ malo.

¹²Adier, Ruoth Nyasaye Manyalo Gik Moko Duto oseketo chieng, ma noyalie josunga ma kawore, mi oruch e buru.

¹³Chieng’no yiend sida maboyo duto man Lebanon, kod yien madongo duto man Bashan nokul piny

¹⁴kaachiel gii gode maboyo duto,

¹⁵gi kuonde mochiel motegno mag siro lweny, kod ohinga maboyo duto.

¹⁶Kata mana yiedhi madongo duto madhi Tarshish, kod mago mag Arabia bende nokethi chieng’no.

¹⁷Duong’ duto ma dhano nigo noduog piny. Sunga mar dhano bende noruchre e buru.

¹⁸Nyiseche manono duto nokethi, mi tiek chuth.

¹⁹Ka Ruoth Nyasaye oa malo mondo otieng piny, to ji nodonj e buche manie lwendni, kata manie lowo, ka giluoro duong’ malich mar Ruoth Nyasaye kod tekone.

²⁰Adier, chieng’ ma Ruoth Nyasaye oa malo mondo oyieng piny, to nyiseche manono mane ji oseloso gi fedha kod dhahabu, giniwit ni olwende kod oliktiga

²¹mi ginidonj e buche manie lwendni kendo manie kor gode maboyo, ka giluoro duong’ malich mar Ruoth Nyasaye kod tekone.

²²Kik iket genoni kuom dhano, nimar onge gima dhano nyalo. En gima nono mana ka muya mawuok e ume!