Read luo Isaya 31 Bible Online

Isaya 31 - luo bible

Isaya 31

¹Mano kaka utimo gima ofuwo, un joma dhi Misri mondo uyud konyruok! Uketo genou kuom farese, kendo kuom geche mag lweny mang’eny ka kuoyo, kod joidh farese gana gi gana, to ok udew Ruoth Nyasaye ma Ng’ama Ler mar Israel, kata kwaye mondo otelnu.

²To Ruoth Nyasaye riek, kendo onyalo kelo masira, bende ok olok parone. Obiro kumo oganda mar joricho, kaachiel gi joma konyogi.

³Jo-Misri gin mana ji, to ok gin Nyasaye, bende faresegi gin mana ring’o to ok gin roho. Omiyo ka Ruoth Nyasaye orieyo bade mondo okumgi, to joma ikonyo kaachiel gi joma konyogi, nopodh piny, mi gilal nono giduto.

⁴Ruoth Nyasaye osewachona niya, “Kaka sibuor kata nyathi sibuor ng’ur, kachamo chiayo mosemako, to ok odew, bende ok oluor kata ka jokwath mang’eny ochokore ka goyo koko, mondo oriembe, e kaka Ruoth Nyasaye Manyalo Gik Moko Duto nolor piny mondo oked ewi got Sayun.

⁵Bende kaka winyo huyo but ode, ka rito nyithinde, e kaka Ruoth Nyasaye Manyalo Gik Moko Duto nobed karito Jerusalem. Ee, norite kendo nokonye, bende norese.”

⁶Yaye, jo-Israel, duoguru ir Nyasaye ma useweyo chuth,

⁷nimar chieng’ ma unuwitie nyisecheu manono mag fedha gi dhahabu, ma useloso gi lwetu motimo richo,

⁸to noneg jo-Asuria gi ligangla, to ok gi ligangla ma dhano kedogo. Giniring lweny, mi yawuotgi ma jolweny nolok wasumbni.

⁹Kihondko nomak jodonggi, mi dhier nono, kendo jotendgi mag lweny bende kibaji nogo ma ok nyal ringo. Mano e wach maradier mar Ruoth Nyasaye, ma maye omoki Sayun. Adier, maye ng’ang’ni Jerusalem.