Read luo Isaya 32 Bible Online

Isaya 32 - luo bible

Isaya 32

¹Winjuru! Ruoth moro biro biro ma norit piny e yo makare, kendo jotende noti gi adiera.

²Adier, ng’at moro nobed ni ji ka kama gibwogoe koth gi yamo, bende noduog chuny ji mana ka aore mamol e piny motwo, kata ka tipo mang’ich mar lwanda maduong’, man e piny maliet ma chieng’ kechie.

³Wenge joma neno onge gima nomon neno, bende it joma winjo nowinj awinja.

⁴Chuny ng’at mamwomore nobed gi rieko, kendo ng’at ma radwal nolos maber.

⁵Ng’at ma achach ok nochak oluong ni ng’at malong’o, bende ng’at ma jamganga ok nochak oluong ni ng’ama ogen,

⁶nimar ng’at ma achach nobed kawuoyo ka ng’ama achach adier, kendo chunye ka paro mana timo timbe manono. Gik motimo duto nobed gik maricho, kendo ka owuoyo to owacho miriambo koda ka kuom Ruoth Nyasaye. Omono joma odenyo chamo gik ma onego gicham, bende otamo joma riyo oloyo modho.

⁷Ng’at ma achach yorene richo. Ochano gik maricho e chunye, mondo ohiny joma odhier gi weche mag miriambo, kendo otamo jochan e adiera monego giyudi.

⁸Ng’at ma jaadiera to paro mana gik makare, kendo ok we adiera kata matin.

⁹Un mon modak e ngima maber, auru malo mondo uwinj gima awacho! Un nyiri ma ok dew gimoro.

¹⁰E sani pod onge gima badhou, to bang’ higa achiel gi ndalo moko manok, unubed gi kibaji, nikech cham ok nochiegi, omiyo ok nuyud gima ukayo.

¹¹Un mon ma sani odak e ngima maber, parreuru! Weuru dhil mudhilgono! Lonyreuru duk mondo utue piende gugru e nungou,

¹²kendo ywaguru, nikech puotheu momew kod mzabipu ma nyago olemo mabeyo biro kethore.

¹³Kudho kod pedo ema biro gawore e puothe joga, nimar ot ka ot ma yande mor nitie e dalau maduong’, nodong’ nono.

¹⁴Ji noring owe udi mabeyo madongodongo duto, mi dala ma yande ji thothie nodong’ nono. Nobed lek maber ni le mae thim, kendo jamni bende nokwae. Kuonde moting’ore mochiel motegno mag siro lweny kod kuonde maboyo mag rito, nolokre thim kuom ndalo mang’eny,

¹⁵nyaka chop roho moa e polo malo lor kuomwa. Eka piny motwo nolokre puothe momew, mi yien mabeyo dongie.

¹⁶Bang’e adiera gi tim makare nobedi e piny duto, kuonde momew koda ka kuonde motimo ongoro,

¹⁷mi kue nosik nyaka chieng’, kendo luoro ok nobedie.

¹⁸Kamano joga nobed e piny mokue, ka gidak gi mor, ma onge koko.

¹⁹Tik gode ma otimo bungu nobed mang’ich maber, kendo mier manie pap nobed gi kue.

²⁰Koro mano kaka unubed mamor, ka ng’ato ka ng’ato kuomu chwoyo chambe e bath aora, kendo weyo jambe wuotho awuotha kaka ohero!