Read luo Isaya 33 Bible Online

Isaya 33 - luo bible

Isaya 33

¹Yaye unune malit un jo-Asuria! Useketho gik moko, to un pok okethu. Bende usendhogo ji, to un pok ondhogu. To koro ka usetieko ketho gik moko, to uun ema ibiro kethu, kendo ka utieko ndhogo ji, to un ema ibiro ndhogu.

²A Ruoth Nyasaye, wan too kechwa nimar wageno kuomi. Yie imiwa teko okinyi kokinyi, kendo reswa e kinde mar masira.

³Ka ji owinjo kiting’o dwondi, mi imor, to giringo, kendo ka ia malo, to ogendini ke.

⁴Mwandugi noyaki, mi tieki, mana kaka bonyo nang’o lum, mi tieki. Adier, ji nopot kuomgi mana ka det bonyo.

⁵Ruoth Nyasaye duong’ moloyo, nikech odak e polo malo. Opong’o Sayun gi adiera kod tim makare,

⁶kendo ubiro yiengoru kuome e ndalou duto. Rieko gi ng’eyo ema kelo resruok, kendo luor ma oluorgo Ruoth Nyasaye e mwandune!

⁷Neuru kaka thuondu ywak e wang’yore. Adier, joote museoro mondo odwar kue, ywak malit.

⁸Yore madongo odong’ nono; jowuoth ok luwgi. Singruok duto okethi, kendo winjruok motim ok dew. Dhano bende ok kwan ka gimoro.

⁹Piny ywak, kendo dok chien. Lebanon two, kendo kethore Sharon bende olokore thim, kendo Bashan gi Karmel oyaki modong’ nono.

¹⁰Ruoth Nyasaye wacho ni jo-Asuria niya, “Koro abiro a malo mondo anyis duong’na maler.

¹¹Gik ma uchano timo gin gik manono, kendo yamo maliet ka mach biro tiekou pep.

¹²Ogendini nokethi chuth, mi lokre pidhe mag choka, kendo ginichal gi kudho mobeti, mi owang’ e mach.

¹³Un mudak kuonde maboyo, winjuru gima asetimo. To un ma un machiegni, yieru ni aratego.”

¹⁴Joricho modak Sayun biro tetni ka luoro omako. Adier, joma ok dew Nyasaye kihondko nomaki, mi ginipenjre niya, “Bende nitie ng’ato kuomwa manyalo dak gi mach mawang’o gik moko duto? Koso en ng’a ma didag gi mach maliel nyaka chieng’?”

¹⁵Ng’atno nyakaa bed mana ng’at ma timbene oriere, kendo ma wacho adiera, bende ma ok dwar mwandu miyudo gi malang’, kendo ma riembo asoya kucha, bende ma dino ite ni weche mag chwero remo, kendo ma umo wang’e ni timbe mamono.

¹⁶Ng’at ma kamano nodag kama oting’ore mokue. Got mabor motimo lwendni ema nobed kare mar g’eng’ruok, kendo enobed koyudo chiemo gi pi morome.

¹⁷Enone Ruoth gi duong’ne duto, kendo norang piny moyarore malach.

¹⁸Chunye nonyise gik machon, kendo nopar kaka ne oluoro wasigu mane ochung’ e tok ohinga mar dalagi, ka chano kaka dimwom ohingano, mi yakgi.

¹⁹Ok enochak one oganda mager ma dhogi tek winjo, kendo mawuoyo kabodho wach ma ok winjreno.

²⁰Ka orango Sayun, dala mwatimoe sewni, to enone ni en dala man gi kue. Ee, kong’iyo Jerusalem, to enone ni ochalo gi hema ma ok tungni, ma loyene ogur motegno kendo ma kata tonde achiel ok ochot.

²¹Kanyo ema duong’ maler mar Ruoth Nyasaye nonenree Enochalnwa aora malach man gi bade mang’eny. Onge yiedhi ma nokwang’ kanyo, kikiewo, kata ma noringie gi tanga. Tondegi ombekni ma ok nyal rido murungot, kata ywayo tanga,

²²nimar Ruoth Nyasaye en jang’adnwa bura. En e ruodhwa, ma ketonwa chik, kendo en ema noreswa.

²³Bang’e ng’ama muofu kod ng’ama rang’ol bende noyud pok kuom gik moyaki.

²⁴Onge ng’at ma odak kuno ma nowach ni otuo, kendo richo mag ji man kuno nong’wonnigi.