Read luo Isaya 36 Bible Online

Isaya 36 - luo bible

Isaya 36

¹E higa mar apar gang’wen, mar loch Hezekia, Senakerib ruodh Asuria nomonjo miech Juda mochiel motegno duto, mokawo.

²Ne ooro Rabshake kod oganda lweny mang’ongo ka en Lakish mondo odhi Jerusalem ir ruoth Hezekia. Kane Rabshake ochopo kuno, ne ochung’ but fereji magolo pi e yawo mamalo man yo mochiko puodho milyuongo ni Pwoth Jalwok Lewni.

³Eliakim wuod Hilkia ma jaduong’ od ruoth, gi Shebna jagoro, kod Joa wuod Asa jachan weche mag piny ne jowuok modhi ire kanyo.

⁴Eka Rabshake nowachonigi niya, “Nyisuru Hezekia ni ruoth maduong’ ma ruodh Asuria owacho kama: ‘Ere gima omiyo idhialori kamano?

⁵In iparo ni weche awecha nyalo lokore rieko kod teko miloyogo lweny? En ng’a ma igeno ni biro konyi piem koda?

⁶ Ang’eyo ni idhialori nikech jo-Misri, to nyaka ing’e ni jo-Misri chalo gi odundu mobarore, ma ka ng’ato oyiengoree, to pilore kendo chwowo lwete. Mano e kaka Farao, ruodh Misri, chalo, ni jogo duto mogeno kuome!’

⁷To kuwachona ni ugeno kuom Ruoth Nyasaye ma Nyasachu, to donge en e Nyasaye ma Hezekia hembko gi kuonde mitimonee misengni, kochiko jo-Juda gi jo-Jerusalem ni nyaka lem mana e nyim kendo-mar-misango man Jerusalem kende?

⁸“Koro in Hezekia, singri ni ruodh Asuria ma atiyone! Ayie miyi farese alufu ariyo kapo nono ni inyalo yudo joma idhogi!

⁹Ka jo-Misri ema igeno ni biro konyi gi geche kod joidh farese, to ere kaka iparo ni dilo kata mana achiel matinie moloyo kuom jotend lweny mag ruodha?

¹⁰Koso iparo ni asebiro mana ni mondo amonj amonja Jerusalem, akethi, ka ok Ruoth Nyasaye ema oyiena? Ng’eni Ruoth Nyasaye ema nowachona ni mondo abi amonj pinyni akethi.”

¹¹Eka Eliakim gi Shebna kod Joa nowacho ni Rabshake niya, “Wasayi, yie iwuo kodwa gi dho Aram, nikech en dhok mwang’eyo, to we wuoyo kodwa gi dho Hibrania kae, nimar joma ni ewi ohinga nyalo winjowa.”

¹²To Rabshake ne odwokogi, ka penjogi niya, “Uparo ni un kod ruodhu kende ema ne ruodha oora iru mondo awachnu wechegi? Ooyo, oora ir joma nie wi ohinga, ma ochunore ni nyaka cham chiethgi, kendo madh lachgi giwegi, mana kaka un bende unutim!”

¹³Bang’ mano nochung’ mokok gi dwol maduong’ gi dho Hibrania niya, “Winjuru wach ruoth maduong’ ma ruodh Asuria!

¹⁴Owacho ni kik uyie Hezekia wuondu, nikech ok onyal resou.

¹⁵Bende kik uwe ohou ni mondo ugen kuom Ruoth Nyasaye, kowachonu ni, adier Ruoth Nyasaye ema noresu, kendo ni ruodh Asuria ok nokaw dala maduong’ni.

¹⁶Kik uwinj wach Hezekia, nimar ruodh Asuria owacho niya, ‘Winjreuru koda, mondo ubi ira, mi ng’ato ka ng’ato kuomu nocham olemb mzabipe kod ng’ope, bende nomodh pi e sokone owuon,

¹⁷nyaka chop abi mi agolu kendo ateru e piny machal gi pinyuni. En piny ma cham gi mzabibu chiekie maber, kendo ma makati gi divai ng’enyie.

¹⁸Tang’uru, nono to Hezekia owitou, kowuondou ni Ruoth Nyasaye biro konyou. Bende nitie nyasach piny moro mosereso pinye e lwet ruodh Asuria?

¹⁹Nyiseche mag Hamath gi Arpad ni kanye? Koso ere nyiseche mag Sefarvaim? Bende ne gireso Samaria e lweta?

²⁰Kuom nyiseche duto mag pinjego, ere moro mosereso pinye e lweta, ma dimi upar ni Ruoth Nyasaye nyalo reso Jerusalem e lweta?’ ”

²¹To ji noling’ thi, ma onge ng’at modwoke wach kata achiel, nikech ruoth Hezekia nosegolo chik ni kik dwoke.

²²Eliakim wuod Hilkia ma jaduong’ od ruoth, gi Shebna jagoro kod Joa wuod Asaf ma jachan weche mag piny ne jobiro ir Hezekia, ka joyiecho lepgi, mi ginyise gima ne Rabshake owacho.