Read luo Isaya 4 Bible Online

Isaya 4 - luo bible

Isaya 4

¹E kindeno chwo manok kende ema nodong’, kendo mon abiriyo nobed ka laro dichwo achiel, ka wachone niya, “Yie mondo wabed mondi waduto. Chiemo mwachamo gi lewni mwarwako to wabiro yudo wawegi, to yie ayieya oluongwa mana ni mondi, mondo kik wane wichkuot ni waonge gi chwo.”

²E ndalogo, yath ma Ruoth Nyasaye osepidho nobed gi duong’ kendo nonere maber, bende olemo ma piny onyago ema nobed gima kelo ni jo-Israel motony mor kod pak.

³Eka jogo ma odong’ Jerusalem ma moro ka moro ondik nyinge e kitap ngima, noluong ni joma ler.

⁴Ruoth Nyasaye biro ng’ado bura maliel ka mach, kolwoko chind mond Sayun, kendo opwodho remo mochwer e dalano.

⁵ Bang’e Ruoth Nyasaye nohon rumbi mar iro godiechieng’, kod ligek mach mang’ang’ni gotieno e wi udi man e got Sayun, kod kuonde chokruok, nikech duong’ nolandore kuonde duto

⁶mana ka tado makelo tipo ka chieng’ rieny kendo ka kama ji ringo tonyie, kendo bwogoe koth gi yamo maduong’.