Read luo Isaya 40 Bible Online

Isaya 40 - luo bible

Isaya 40

¹Nyasachu wacho kama: “Houru chuny joga! Hogiuru!

²Wuouru gi jo-Jerusalem gi muolo, kuwachonigi ni gisetieko ndalogi mag tuech, kendo ni osekumgi moromo. Ruoth Nyasaye osekumogi nyadiriyo kuom richogi duto.”

³ Dwol moro kok niya, “Losuru ni Ruoth Nyasaye yo e thim. Losuru ni Nyasachwa ndara mopie e piny motwo.

⁴Hohni duto nobugi kendo gode duto nopie. Yore motimo gogni bende nobed maler, kendo kuonde motimo gode nobed pewe.

⁵Eka duong’ maler mar Ruoth Nyasaye nofwenyre, mi ji duto nonene kaachiel, nimar Ruoth Nyasaye owuon ema owacho kamano.”

⁶ Dwol moro wacho niya, “Ting’ dwondi iwuo.” To moro dwoko ni, “Ere gima dawachi?” “Wach niya, ‘Dhano ka dhano chalo gi lum, kendo berne duto chalo gi maua manie pap.

⁷Lum ner, kendo maua two, ka much Ruoth Nyasaye okudhogi. Chutho, dhano chalo gi lum.

⁸Adier, lum two, maua bende ner, to wach Nyasachwa to osiko nyaka chieng’.’ ”

⁹In mikelo ni Sayun wach maber, idh wi got mabor, kendo ikogi matek. Ee, in mikelo ni Jerusalem wach maber, ting’ dwondi, ikogi matek ka ok iluor, kiwacho ni miech Juda niya, “Eri, Nyasachu ni ka.”

¹⁰ Ng’euru ni Ruoth Nyasaye biro gi teko. Obiro loyo piny gi tekone maduong’ neuru, obiro gi joge mogonyo e lweny ka wuotho e nyime, ka gik moyako.

¹¹ Ochalo jakwath ma sembo jambe, koting’o nyirombe e bade, kendo oriwogi e kore, kotelo ni mago man gi nyithindo, kotero modho.

¹²En ng’a mane opimo pi nembe e chuny lwete, kata mane opimo duong’ mar polo gi lith lwete? En ng’a mane opimo lowo duto manie piny, kata mane opimo gode madongo gi matindo e ratil mak mana Ruoth Nyasaye?

¹³ Ere ng’at ma oseng’ado ni Ruoth Nyasaye rieko, kata mosechung’ e dire ka puonje?

¹⁴Bende Ruoth Nyasaye osedwaroe rieko moro kuom ng’ato, kata dwaro ni mondo ng’ato opuonje adiera kod yore mabeyo? Ooyo, ok osetimo kamano,

¹⁵nikech ogendini duto mag piny ok gimoro kipimo kode. Giromre mana gi pi maton kaa e dapi, kata ka buru momoko e ratil. Adier, chulni gi dhonembe duto yotne mana ka muya!

¹⁶Yien duto manie piny Lebanon, kaachiel gi le duto man kuno, ok nyal romo timonego misango miwang’o pep.

¹⁷Ogendini duto ok gimoro e nyime. Okwanogi ka gik manono ma onge tich.

¹⁸ En ng’a ma dipim gi Nyasaye? Koso ang’o ma diwachi ni chal kode?

¹⁹Dochal gi kido ma ng’ato ochueyo, kendo ma jatheth dhahabu obawo gi dhahabu, mi othedhone thiwni mag fedha koso?

²⁰Koso dochal gi yien maber ma ok tow ma ng’ato oyiero, mi oluongo japecho molony mondo olosnego kido mopa ma ok nyal podho?

²¹Donge ung’eyo, koso pok uwinjo,

²²ni Nyasaye obet e polo malo, kendo ni joma odak e piny chalone mana dede. Ok osewachnu kamano chakre chon? Koso pok uparo nyaka ne chue piny ni en ema ne oyaro polo mana ka pasia, kendo ogure mana ka hema midakie?

²³Odwoko ruodhi gi jotelo duto piny, mi lokre gima nono.

²⁴Ka okudho muya kuomgi, to giner, mi kalausi dhi kodgi mana ka mihudhi, nimar gichalo gi kodhi mokom machiegni, ma tiendegi pok ochwowo lowo.

²⁵Ng’ama Ler penjo niya, “To koro en ng’a ma duporago? Koso ere ng’ama dirom koda?

²⁶Ting’uru wengeu malo e polo, mondo upar ane ng’ama ne ochueyo gigo duto. Donge en mana Jal mane otelo ni oganda mar sulue, ka oluongo moro ka moro gi nyinge, mana ka gima en jaduong’ lweny motelo ni jolwenje? Tekone maduong’ malich omiyo onge kata mana sulue achiel ma ok ochung’ kare.

²⁷Un jo-Israel ma nyikwa Jakobo, ere gima omiyo ung’ur, kuwacho niya, “Ruoth Nyasaye ok ne yorewa, kendo ok ong’adnwa bura maber”?

²⁸Donge ung’eyo, koso pok uwinjo, ni Ruoth Nyasaye ma Nyasaye mochwere, kendo ma Jachuech piny malichni duto, ok ol, kendo ok nyosre? Parone tut, ma odhiero dhano ng’eyo.

²⁹En ema omiyo joma ool teko. Adier, omedo muya ni joma tekogi orumo.

³⁰Joma tindo nyalo ol, mi nyosre, kata mana yawuowi mopong’ bende nyalo chwanyore, mi podhi.

³¹To joma ogeno kuom Ruoth Nyasaye, tekogi noduogi. Ginihu ka ongo, mana ka gima gin gi buombegi, kendo giniringi, to ok giniol, bende giniwuothi, to tekregi ok norum.