Read luo Isaya 42 Bible Online

Isaya 42 - luo bible

Isaya 42

¹ Neuru! Ma e jatichna ma atayo. En ng’at ma aseyiero, kendo ma chunya morgo. Aseketo roho mara kuome, omiyo obiro kelo adiera ni ogendini.

²Ok nokogi, kata nduru ok nogo, dwonde bende ok nowinji e yore.

³Kata mana odundu motore ok notur mi owiti ka gima nono, bende ok nosim kata mana taya maliel marachrach, to enong’ad bura mana gi adiera.

⁴Ok nochwanyre kata chunye ok nonyosre to enokel adiera e piny, kendo pinje manie dhonembe rito mondo chikne obi.

⁵ Ruoth Nyasaye mane ochueyo polo mi oyaro, kendo ochueyo piny gi gik mangima duto mantie, mi ochiwo muya ni joma odakie kod gik moko duto mangima, wacho kama:

⁶ “An Ruoth Nyasaye, aseluongi ni mondo itim gima kelo resruok. Asemako lweti mondo ariti, kendo anami ibed ng’at ma kelo singruok e kinda gi ji,

⁷mondo iyaw wenge muofni kendo igol joma otue e mudho kuma gidakie.

⁸An e Ruoth Nyasaye, kendo mano e nyinga. Ok ayie mondo duong’ ma imiya omi nyasaye moro machielo, bende ok ayie mondo pak mipakago opakgo gik ma opa.

⁹Neuru kaka gik mane akoro osetimore. To koro anyisou gik manyien ma biro timore. Adier, ahulonugi kapok gitimore.”

¹⁰Weruru ni Ruoth Nyasaye wer manyien, kupako nyinge e piny duto. Un mukwang’ e nam, pakeuru kaachiel gi gik manie nam.

¹¹Thim, kod mier man kuno, mondo obed mamor, kaachiel gi kuonde dak mag jo-Arabu ma Kedar. Un joma odak Sela, koguru gi mor ewi gode.

¹²Un duto mudak e dhonembe gi chulni, pakeuru. Kamano ji duto mondo omi Ruoth Nyasaye duong’.

¹³Ruoth Nyasaye biro wuok oko ka thwon maratego. Enobed gi mirima mager mana ka jalweny, kendo enokogi ka ogoyo sigich lweny, mi olo wasike.

¹⁴An Ruoth Nyasaye, aseling’ kuom ndalo mang’eny, ka abedo gi kue, kendo ka aterora mos, to koro abiro ywak ka dhako ma muoch kayo, ka aomo chunya, kendo agamo yueyo.

¹⁵Anatiek gik moko duto manie gode, ka amiyo gik mang’ich duto man kuno two. Anami aore lokre kuonde motwo, kendo adwon yewni duto.

¹⁶Bang’e anatel ni muofni e wuodhgi, ka amiyo giluwo yore ma ok ging’eyo. Mudho ma giwuothoe analoknigi ler, kendo anarie yore mobam ma giluwo. Mago duto natim mak ok aweyo moro mak atimo.

¹⁷To joma ogeno mana kuom gik mopa, ma luongo gik maket ka nyisechegi, noyud wichkuot, kendo nodwok chien.

¹⁸Un joma itgi odino, koro winjuru! Yaye un muofni, ranguru mondo unen!

¹⁹Ere muofu maloyou, un jo-Israel jotichna? Kata ere ng’ama ite odino moloyou, un jootena ma aoro? Koso ere muofu maloyou un joma atimogo singruok mar kue, kata ma ite odino maloyou un jotich Ruoth Nyasaye?

²⁰Useneno gik mathoth, to ok udewgi. Un gi it, to onge gima uwinjo.

²¹Ruoth Nyasaye noneno ni ber mondo chikne obed gi duong’, mondo adierane olandre.

²²To kata kamano jogi gin joma oyaki, kendo oter e tuech. Giduto gisenyumore e obadho mokunynigi, mi gilal e ut tuech. Omakgi, mi odhi kodgi mana ka gima gin gik moyaki, ma onge ng’ama nyalo resogi, kata wacho ni mondo odwokgi.

²³Un joma nyalo winjo wach, chikuru itu uwinji. Ee, chakre kawuono, chikuru itu.

²⁴En ng’a, mane ochiwo jo-Israel ma nyikwa Jakobo e lwet joyeko? Donge en Ruoth Nyasaye? Ne giketho e nyime, mi gitamore luwo yorene, kendo gidagi rito chikne.

²⁵Mano ema omiyo noolo mirimbe mager kuom jo-Israel, kokelonigi lweny maliet ka mach. Ne olworogi gi mach koni gi koni, to ne ok giwinjo tiend kumno. Adier, ne orewogi, to kata kamano ne ok gidewo.