Read luo Isaya 43 Bible Online

Isaya 43 - luo bible

Isaya 43

¹Un jo-Israel ma nyikwa Jakobo, Ruoth Nyasaye mane otimou oganda wacho kama: “Kik ubed maluor nikech asewarou. Aseluongou gi nyingu, omiyo un joga awuon.

²Ka ukadho e pige matut, to an kodu. Adier, ka ng’ado aore, to ok giniteru, bende kata ka uwuotho e mach mang’ang’ni to ok unuwang’,

³nimar an Ruoth Nyasaye ma Nyasachu, ma Ng’ama Ler mar Israel, kendo ma jaresu. Achiwo Misri gi Ethiopia kod Seba mondo awarugo.

⁴Akwanou ka gima nengone tek, bende un joma ogen, ma ahero, omiyo achiwo pinje moko mondo awarugo. Adier, achiwo jomoko nono mondo aresgo ngimau.

⁵An kodu, omiyo kik ubed maluor. Abiro chokou, ka agolou yo wuokchieng’ gi yo podho chieng’, kaachiel gi nyithindu.

⁶Abiro wacho ni jo-nyandwat ni mondo oweu. Jo-milambo to abiro nyiso niya, “Kik ugeng’nigi,

⁷to keluru yawuota gi nyiga, kugolo kuonde maboyo. Adier, kelgiuru kugologi e tung’ piny koni gi koni. Chutho, keluru ji duto ma iluongo gi nyinga, ma asechueyo, kendo asetimo oganda. Gin joma asechueyo, mondo ayud duong’.

⁸Keluru jogo. Gin joma nigi wenge, to ok nyal neno. Bende gin gi it, to ok ginyal winjo.

⁹Ogendini duto mondo ochokre kaachiel. Ere nyasachgi mane osekoroe gima kama, kata mosehuloe gimoro ka pok otimore? Weuru gikel joneno mondo onyis ane gik mane gitimo, mondo gilo bura, ka wachgi en adier.

¹⁰To ka ok ginyal, to koro, An Ruoth Nyasaye awacho kama: “An to an gi joneno. Un jo-Israel e joneno maga, kendo jotichna. Aseyierou mondo ung’eya, kendo uket genou kuoma. Bende mondo ung’e ni an e Nyasaye. Nyasaye moro motelona ne pok obedoe, bende moro maluwa ok nobedie.

¹¹An kende e Ruoth Nyasaye. Onge jawar moro mak mana an.

¹²An ema asekoro wach, kanyisou malong’o gik mabiro timore, to nyisecheu manono ok osetimo kamano. Un e joneno maga! An Ruoth Nyasaye ema awacho kamano.

¹³An e Nyasaye ma ok lokre nyaka chieng’. Gima amako onge ng’ama nyalo kawo, bende gima atimo, onge ng’ama nyalo ketho.”

¹⁴Ruoth Nyasaye ma jaresu kendo ma Ng’ama Ler mar Israel wacho kama: “Aseoro oganda lweny mondo omonj Babulon nikech un, kendo abiro miyo jo-Babulon podh piny auma ka giringo, mi koko mar mor ma gigoyo lokre ywak.

¹⁵An e Ruoth Nyasaye ma Ng’ama Ler, ma jachuechu, kendo ma Ruodhu, yaye Israel!”

¹⁶An Ruoth Nyasaye ema ne apogo nam, mondo yo obedie e kind pige mogingore madongo.

¹⁷Bende ne amiyo geche lweny kod farese odonjo kuno, kaachiel gi oganda lweny maratego, mong’ielore piny, ma ok nyal chako chung’ kendo. Adier, ne githo mana ka taya mosim. Koro awachonu niya,

¹⁸“Weuru keto chunyu e gik machon, kuparo gik ma osekadho.

¹⁹Koro adwaro timo gima nyien. Neuru, asechako time. Donge unene? Abiro loso yo e piny motwo. Adier, abiro loso yore e piny motimo ongoro.

²⁰Le mae thim, kaka bwe kod udo nogona erokamano, nikech abiro kelo pi e piny motwo, mi alos yore e piny motimo ongoro, mondo joga moyier oyud pi mamodho.

²¹Gin ji mane atimo ogandana awuon, mondo oland weche ma miya duong’.

²²To neyeuru, ni ne ok uluonga mondo akonyu, yaye joka Jakobo! Useol koda, A Israel!

²³Ok usetimona misengni miwang’o pep mag rombe, kendo ok usemiya duong’ kutimona misengni mamoko. To ok asechandou mondo utimna misengni mag cham, bende ok asemiyou ting’ mapek, ka adwaro ni mondo uwang’na ubani.

²⁴Ne ok ung’iewona niang’ gi pesau, kata dhila gi boche mag misengniu, ne ok udhila. To ne utura mana gi richou, kendo ne uola mana gi timbeu mamono.

²⁵An kende e jal ma rucho richou oko, mi ok chak par kendo, nikech mano e gima ahero timo.

²⁶Parnauru gik mane otimore chon, mondo wapim wach kaachiel. Wachuru wecheu ane, manyiso ni uonge gi ketho.

²⁷Kwaro mokwongo ne otimo richo, kendo jonabiu ne opiem koda.

²⁸Jodongu bende ne omiyo Hekalu mara odoko mogak. Mano omiyo ne ajwang’o jo-Israel ma nyikwa Jakobo mondo otieki, mi yud wichkuot.