Read luo Isaya 44 Bible Online

Isaya 44 - luo bible

Isaya 44

¹“Koro winjauru un jotichna ma nyikwa jakobo. Chikuru itu un jo-Israel, oganda ma aseyiero.

²An Ruoth Nyasaye ma jachuechu, kendo ma jakonyu, mane olosou chakre e ich, awacho kama: Un joka Jakobo jatichna, ma bende aluongo ni jo-Jeshurun, kik ubed maluor,

³nikech abiro kelo koth mang’eny e lowo motwo mobaro okak. Bende abiro olo rohona kuom kothu, ka aguedhogi.

⁴Ginidongi mana ka lum man kama ng’ich, kata ka yien manie bath aora.

⁵Ng’at moro nowach niya, ‘An ng’at Ruoth Nyasaye.’ To machielo nowach ni en nyakwar Jakobo. Ng’at moro to nondik nying Ruoth Nyasaye e lwete, kendo noluongre gi nying Israel.”

⁶ Ruoth Nyasaye Manyalo Gik Moko Duto ma Ruodh jo-Israel kendo jawargi, wacho niya, “An e mokwongo, kendo an emogik, bende onge Nyasaye moro mak mana an.

⁷To ka ng’ato paro ni rom koda, to mondo ochung’ ane owach kamano. Onego ohul gik manyalo nyiso ni owacho adiera, nikech kane ginyalo koro gik mane otimore chon to kara nyaka bed ni ginyalo hulo gik ma koro eka biro timore!

⁸Kik ubed maluor, bende kik chunyu nyosre! Donge ne anyisou chon ni gima kama biro timore? Adier, ne ahulo wachno, kendo koro ubedo joneno maga! Bende nitie Nyasaye moro machielo, ma ok mana an? Ooyo, ok ang’eyo Jachuech moro machielo.”

⁹Joma loso nyiseche manono gin joma nono oloyo, kendo gik ma giherogo ok kony gimoro. Joma lamogi olokore muofni, kendo ok ging’eyo gimoro, omiyo wigi nokuodi.

¹⁰Ka ng’ato oloso nyasaye manono gi bao kata gi chuma to oketho tekre kayiem,

¹¹nikech joma ogeno kuomgigo biro yudo wichkuot. Bende joma olosogi gin mana ji, ma ok Nyasaye. Koro weuru gichokre giduto mondo gichoma tir ane, mak kihondko bi makogi, mi giyud wichkuot maduong’.

¹²Jatheth ema chwako chuma e mach, eka ogoye gi nyundo mondo othedhe kaka odwaro. Olose gi muche duto, mi obed mool, ka kech ohewe kendo riyo oloye.

¹³Japecho to pimo bao gi tol, kendo oketo alama kuome, eka opaye gi koyo, kendo olose maber e kido mar dhano, mana ni mondo ochunge achunga e od lemo!

¹⁴Ng’ato nyalo pidho yiend sida, kendo koth miyo yien-go dongo, mondo bang’e obed gi yien ma okonyorego. Kata onyalo yiero yath moro maber e bungu, mi otong’.

¹⁵Dir yadhno omoko mach mondo oo, to dire moko ochwakogo chiemo. Moko to olosogo nyasaye molamo kokulorene piny.

¹⁶Adier, dir yadhno konchiel to ochwako, kendo obuloe ring’o mondo ocham, moyieng’. To bende ooyo majno, kowacho niya, “Ero! Awinjo maber, kendo denda yudo liet.”

¹⁷Bang’e bath yadhno modong’ to opayo, kendo olosogo nyasaye, mokulorene nyaka e lowo, kendo olamo, kowacho niya, “Resa, nimar in e nyasacha!”

¹⁸Joma kamago ok ong’eyo gimoro, bende ok giwinj tiend gik moko. Wengegi odinore ma ok ginyal neno, kendo chunygi thanythany ma ok ginyal fwenyo tiend gimoro.

¹⁹Ng’at machal kamano onge gi paro kata rieko ma onyalo penjorego kende niya, “Bath yadhni konchiel ne achwako, mi atedogo makati. Bende asebuloe ring’o mi achamo, to koro ere kaka dalok dire konchiel modong’ bed nyasaye? Koso ere gima omiyo onego akulra piny, kalamo mana osiki motong’ mar yath?”

²⁰Ng’at ma kamano chamo mana buch kendo! Parone mofuwo osewuonde, mowite. Omiyo oonge gi rieko monyalo parogo ni gima oting’o e lweteno ok en gima adier.

²¹“Parieuru mago duto un nyikwa Jakobo. Adier, un jo-Israel, paruru ane, nimar un jotichna, omiyo kik wiu wil koda.

²²Aserucho richou, mi oduono mana ka ong’ueng’o. Ee, asekeyo timbeu mamono mana ka boche polo. Duoguru ira, nikech asewarou.”

²³Koguru gi mor un polo, nimar Ruoth Nyasaye ema osetimo kamano. Un kuonde matut moloyo mag piny, gouru mahu gi mor, kendo un gode kaachiel gi bunge kod yien, weruru wende locho, nikech Ruoth Nyasaye osewaro jo-Israel ma nyikwa Jakobo, komiyogo nyinge duong’.

²⁴Ruoth Nyasaye ma jawaru, kendo mane ochueyou e ich, wacho kama: “An e Ruoth Nyasaye mane ochueyo gik moko duto. Ne ayaro polo awuon, kendo ne aloso piny kenda.

²⁵ Ang’eyo jonabi mag miriambo kaachiel gi ranyisigi, bende akuodo wi ajuoke. Adwoko weche joma riek chien, kamiyo riekogi lokore gima nono

²⁶To weche ma jotichna okoro, amiyo timore, kendo achopo gik ma jootena ochano. Awuoyo kuom Jerusalem ni, ji nochak odag kuno kendo, mi achak alos kuonde mokethore duto kuomgi.

²⁷Nam matut, to awachone niya, ‘Duon! Abiro miyo aoreni two kururu.’

²⁸ To Kuros anyiso niya, ‘Ibiro bedo jakwadha, kendo ibiro timo gik moko duto ma adwaro, kigolo chik mondo ochak oger Jerusalem, mi chak ket mise mag Hekalu kendo.’ ”