Read luo Isaya 45 Bible Online

Isaya 45 - luo bible

Isaya 45

¹Ruoth Nyasaye wacho ni Kuros, ruoth moseyiero niya, “Asemako lweti ma korachwich mondo ilo ogendini manie nyimi, kendo iketh teko mag ruodhi, mi iyaw dhorangeye gi dhoudi ma onge kata achiel ma nodong’ ka ochiegi.

²An to anatel nyimi mondo apie gode mogangore. Anatur dhorangeye molos gi mula, kendo nang’ad lodi mag nyinyo.

³Anamiyi mwandu mopandi e mudho, kendo mokan kuonde mopondo, mondo eka ing’e ni an e Ruoth Nyasaye ma Nyasach Israel, ma luongi gi nyingi.

⁴Aseluongi gi nyingi mana nikech jo-Israel ma nyikwa Jakobo, ma jotichna ma aseyiero. Adier asemiyi nying maduong’ kata obedo ni ok ing’eya.

⁵An e Ruoth Nyasaye kendo moro onge. Adier, onge Nyasaye moro mak mana an. Kata obedo ni pok ing’eya, to abiro miyi teko,

⁶mondo ji man yo wuok chieng’ gi yo podho chieng’ ong’e ni onge Nyasaye moro mak mana an.

⁷Achueyo ler, kendo achueyo mudho. Akelo gueth, to masira bende an ema akelo. An Ruoth Nyasaye ema atimo mago duto.”

⁸Un polo, lwaruru piny, mondo tim makare ochwe ka koth, mi piny nyag olemb warruok, kendo tim makare bende omedre. Mago duto, an Ruoth Nyasaye ema achueyo.

⁹ Ruoth Nyasaye Manyalo Gik Moko duto wacho niya, “Mano kaka ng’at mapiem gi jachuechne none malit! Ere kaka agulu dipiem gi ng’ama chueye? Bende lowo dipenj jachuech ni ere gima ochueyo? Koso gima osechue diwach ni jachuech niya, ‘Ikia tich’?

¹⁰Bende nyathi ma koro eka icholo diwach ni wuon gi min ni, ‘Ang’o munywoloni?’ ”

¹¹An Ruoth Nyasaye ma Ng’ama Ler kendo ma Jachuech Israel awacho kama: “Bende duhedhru penja gimoro kuom nyithinda, kata nyisa gima onego atim?

¹²An ema ne achueyo piny, mi aketoe dhano. Ne ayaro polo gi lweta awuon, mi achiko gik moko duto mantie mondo oliel.

¹³An ema aseting’o Kuros malo mondo okel resruok, kendo abiro rieyo yorene tir. Enochak oger dalana, kendo nogony joga mane oter e tuech, mi bed thuolo, to ok nikech ichule gimoro, kata nikech imiye asoya.”

¹⁴Ruoth Nyasaye owacho niya, “Jotich mag Misri gi joohala mag Nubia kod jo-Sabea ma roboche nobed e bwo lochu, mi lokre wasumbu. Adier, ginibi iru kotuegi gi nyororo, mi gikulrenu ka gimiyou duong’, kendo ka giwacho niya, ‘Chutho Nyasaye ni kodu, kendo Nyasaye moro onge. En kende e Nyasaye.’ ”

¹⁵Adier, in Nyasaye mapondo, A Nyasach Israel ma Jawarwa!

¹⁶Ji duto mapiem kodi piny ochamo kendo ogore nyang’eng’o. Joma payo nyiseche manono lal nono ka wigi okuot.

¹⁷Jo-Israel to Ruoth Nyasaye noresi gi resruok mosiko. Piny ok nochak ochamgi, kata ok ginichak gigore nyang’eng’o kendo nyaka chieng’.

¹⁸Ruoth Nyasaye ema ne ochueyo polo, kendo oloso piny moguro motegno. Kane ochueye, ne ok oweye chwangla, to nolose mondo ji odagie. En ema owacho kama: An e Ruoth Nyasaye, kendo onge Nyasaye moro.

¹⁹Ok awuo ling’ling’, kama opondo e piny motimo mudho, bende pok awacho ni joka Jakobo ni mondo okwaya gima ok asechano ni abiro miyogi. An Ruoth Nyasaye awacho adier. Ahulo mana gik ma ratiro.

²⁰Chokreuru usud machiegni, un joma otony e ogendini. Mano kaka ufuwo, un joma ting’o nyiseche molos gi yien, kendo malamo nyasaye ma ok nyal reso ji.

²¹Biuru, uwach wachu ane, ka upenjoru ng’ato gi ng’ato. En ng’a mane okoro ni Kuros biro locho kamano? Koso en ng’a mane owacho chon ni gigo biro timore? Donge ne en mana an, Ruoth Nyasaye? Onge nyasaye moro mak man an, man gi loch, kendo manyalo reso ng’ato. Ooyo, onge moro mak mana an.

²²Un ogendini manie tung’ piny gi tung’ piny, genuru kuoma, mondo uyud resruok, nimar an e Nyasaye, kendo moro onge.

²³ An Nyasaye mangima asekuong’ora! Adier, gima owuok e dhoga en adier, kendo ok nyal lokore. Asesingora ka awacho niya, “Ji duto nogona chonggi piny, kendo ng’ato ka ng’ato nokuong’re ni biro luwa.”

²⁴Ji nowach niya, ‘Ruoth Nyasaye kende ema nigi teko, kendo ema miyo ji locho. Ji duto mapiem kode nochung’ e nyime ka wigi okuot.

²⁵Nyikwa Israel duto nolochi kendo noyud duong’, mana nikech Ruoth Nyasaye.’