Read luo Isaya 46 Bible Online

Isaya 46 - luo bible

Isaya 46

¹Nyiseche Babulon ma Bel gi Nebo okulore piny ka luoro omako. Yande ji ting’ogi ating’a ka miyogi duong’, to koro kenje gi jamni ema oting’ogi, ka gilokore ting’ maturo jamni mool!

²Adier, nyisechego okulore ka luoro omako. Ok ginyal konyo joma lamogi, to gin giwegi ema iting’ogi, kiterogi e tuech!

³Winjuru, un joka Jakobo ma aseting’o nyaka ne nywol. Ee, chikuru itu un jo-Israel modong’, ma aseting’o nyaka ne a e ich.

⁴Kata ka udoko moti, to pod an e En. Adier, kata ka wiu oti lwar, to pod nating’u ating’a. Kaka asechueyou, e kaka abiro ting’ou. Ee, pod abiro ting’ou kendo resou.

⁵Uparo ni achal gi ng’a? Koso en ng’a marom koda?

⁶Dupima gi nyasaye ma dhano loso koso? Joma dwaro nyasaye machal kamano kawo dhahabu mang’eny, kendo pimo fedha e ratil, eka gindiko jatheth mondo olosnigigo nyasayeno. Bang’e gilame ka giriere piny e nyime.

⁷Giting’e e gokgi ka gitere dala, kendo girenje piny, mi ochung’ achung’a kanyo ma ok ong’ingni. Kata ka ng’ato kokne matek manade, to ok onyal dwoke, bende ok onyal rese e chandruok.

⁸Paruru wachno, mondo utang! Yaye, un joma piem koda, paruru wachno e chunyu.

⁹Kik wiu wil gi gik mane otimore chon, nimar an Nyasaye, kendo onge moro. Adier, an Nyasaye, kendo onge moro marom koda.

¹⁰Anyiso giko mar gimoro mana e kinde ma ochakoree. Nyaka nene asebedo ka ahulo gik ma pok otimore, ka awacho niya, “Gima awacho nyaka timre. Omiyo abiro timo gimoro amora ma adwaro.”

¹¹Aluongo ng’ato e piny mabor mondo otim gima adwaro. Obiro biro kaka winyo mager, koa yo wuok chieng’. Asewuoyo, kendo abiro timo kaka asewacho. Adier, asechano gima adwaro timo, kendo abiro timogo mak orem.

¹²Winjauru, un joma chunygi tek, ma paro ni resruok pod bor.

¹³Akelo resruok mara machiegni. Ok en mabor ngang’! Adier, kony ma akelo ok bi deko. Anares ji Sayun, mondo jo-Israel mamiya duong’ oyud konyruok.